ប្រទេសហ្ស៊កដានី ធ្វើជាម្ចាស់ផ្ទះកិច្ចប្រជុំកំពូលនៅថ្ងៃអង្គារនេះ ស្តីពីការឆ្លើយតបជាបន្ទាន់ផ្នែកមនុស្សធម៌សម្រាប់ប្រជាជនប៉ាឡេស្ទីនដែលស៊ូទ្រាំនឹងសង្រ្គាមដ៏សាហាវជាង ៨ខែ នៅក្នុងតំបន់ហ្កាហ្សា ជាកន្លែងដែលអង្គការសហប្រជាជាតិ បានព្រមានអំពីទុរ្ភិក្សកំពុងកើតមានឡើង។

ជាមួយនឹងការកាត់ផ្តាច់អាហារ ទឹក និងថាមពលក្នុងទឹកដី ប្រជាជនហ្កាហ្សាភាគច្រើន ពឹងផ្អែកលើការ   ផ្តល់ជំនួយជាបណ្តើរៗតាមផ្លូវគោក សមុទ្រ និងផ្លូវអាកាស។

កិច្ចប្រជុំកំពូលស្វែងរកការប្រមូលផ្តុំមេដឹកនាំ និងមន្ត្រីជំនួយ ដើម្បី «កំណត់មធ្យោបាយសម្រាប់ពង្រឹងការឆ្លើយតបរបស់សហគមន៍អន្តរជាតិចំពោះគ្រោះមហន្តរាយមនុស្សធម៌ នៅតំបន់ហ្កាហ្សាស្ទ្រីប»។ នេះបើយោងតាមតុលាការរាជវង្សហ្ស៊កដានី។

សន្និសីទនេះ ត្រូវបានរៀបចំរួមគ្នាដោយអង្គការសហប្រជាជាតិ ហ្ស៊កដានី និងអេហ្ស៊ីប នៅឆ្នេរសមុទ្រ Dead Sea ហើយមានការចូលរួមពីរដ្ឋមន្ត្រីការបរទេសអាមេរិក លោក អង់តូនី ប្ល៊ីនខិន ក៏ដូចជាប្រធានអាជ្ញាធរប៉ាឡេស្ទីន លោក ម៉ាខ្មូត អាបាស (Mahmud Abbas)។

លោក ប្ល៊ីនខិន កំពុងបំពេញទស្សនកិច្ចលើកទី៨ របស់ខ្លួន ទៅកាន់តំបន់នេះ ចាប់តាំងពីសង្រ្គាមផ្ទុះឡើង ដោយស្វែងរកការជំរុញកិច្ចព្រមព្រៀងបទឈប់បាញ់ និងការដោះដូរចំណាប់ថ្នូរ ដែលធ្វើឡើងដោយប្រធានាធិបតីអាមេរិក ចូ បៃដិន កាលពីចុងខែឧសភា។