របាយការណ៍របស់ប៉ាឡេស្ទីន បាននិយាយថា មនុស្សពីរនាក់ បានស្លាប់នៅក្នុងការវាយឆ្មក់របស់កងទ័ពអ៊ីស្រាអែល នៅតំបន់វេសបែង កាលពីថ្ងៃចន្ទ។

អង្គការសកម្មប្រយុទ្ធប៉ាឡេស្ទីនហាម៉ាស បាននិយាយថា សមាជិកម្នាក់នៃកងកម្លាំងយោធារបស់ខ្លួន ត្រូវបានសម្លាប់ នៅទីក្រុង Tulkarem។ យោងតាមក្រសួងសុខាភិបាលនៅទីក្រុងរ៉ាម៉ាឡា ក្មេងប្រុសអាយុ ១៥ឆ្នាំម្នាក់ ត្រូវបានបាញ់សម្លាប់នៅក្នុងឧប្បត្តិហេតុដាច់ដោយឡែកមួយនៅទីប្រជុំជន Fara ភាគខាងត្បូងនៃទីក្រុងTubas ។ មនុស្ស ៥នាក់ផ្សេងទៀត បានរងរបួសដោយការបាញ់ប្រហារ។ អ្នកនាំពាក្យកងទ័ពអ៊ីស្រាអែល បាននិយាយថា របាយការណ៍នេះ កំពុងត្រូវបានគេស៊ើបអង្កេត។

ស្ថានភាពនៅតំបន់វេសបែង ដែលកាន់កាប់បានកាន់តែអាក្រក់ទៅៗ ចាប់តាំងពីការចាប់ផ្តើមនៃសង្គ្រាមរវាងអ៊ីស្រាអែល និងក្រុមហាម៉ាស នៅតំបន់ហ្កាហ្សាស្ទ្រីប កាលពីថ្ងៃទី៧ ខែតុលា។ ចាប់តាំងពីពេលនោះមក ជនជាតិប៉ាឡេស្ទីនចំនួន ៥១២នាក់ ត្រូវបានសម្លាប់នៅក្នុងប្រតិបត្តិការយោធា ការប្រឈមមុខដាក់គ្នា ឬការវាយប្រហាររបស់ពួកគេផ្ទាល់។ នេះបើយោងតាមក្រសួងសុខាភិបាលក្នុងតំបន់។

កងទ័ពអ៊ីស្រាអែល បាននិយាយកាលពីថ្ងៃចន្ទថា ប្រជាជនប៉ាឡេស្ទីនប្រហែល ៤.១៥០នាក់ ដែលគេតាមស្វែងរកចាប់ខ្លួន ត្រូវបានចាប់ខ្លួន នៅតំបន់វេសបែង ចាប់តាំងពីសង្គ្រាមចាប់ផ្តើម។ កងទ័ពបានបញ្ជាក់ថា ប្រហែល១.៧៥០នាក់ក្នុងចំណោមពួកគេ ជាសមាជិករបស់ក្រុមហាម៉ាស។