អនុប្រធានាធិបតីរបស់ប្រទេសម៉ាឡាវី លោក Saulos Chilima បានបាត់បង់ជីវិតហើយក្នុងឧបទ្ទវហេតុធ្លាក់យន្តហោះ រួមជាមួយនឹងអ្នកដំណើរ ៩នាក់ផ្សេងទៀត។ នេះបើតាមការប្រកាសរបស់ប្រធានាធិបតីរបស់ប្រទេសនេះ គឺលោក Lazarus Chakwera នៅថ្ងៃអង្គារ (ទី១១ ខែមិថុនា) នេះ។

យន្តហោះនោះបានបាត់ការទាក់ទង បន្ទាប់ពីមិនអាចចុះចតនៅអាកាសយានដ្ឋានអន្តរជាតិ Mzuzu ចម្ងាយប្រហែល ៣៨០គីឡូម៉ែត្រ ភាគខាងជើងនៃរដ្ឋធានី Lilongwe។ ហើយលោក Chakwera បាននិយាយនៅថ្ងៃអង្គារនេះថា បំណែកយន្តហោះត្រូវបានរកឃើញ។

លោក Chakwera បានប្រាប់ថា៖ «ប្រតិបត្តិការស្វែងរក និងជួយសង្គ្រោះដែលខ្ញុំបានបញ្ជាឲ្យស្វែងរកយន្តហោះបាត់ខ្លួននោះ ដែលដឹកអនុប្រធានាធិបតីរបស់យើង និងមនុស្ស ៩នាក់ផ្សេងទៀត ត្រូវបានបញ្ចប់។ យន្តហោះត្រូវបានរកឃើញ។ ហើយខ្ញុំពិតជាមានអារម្មណ៍សោកសៅ និងសោកស្តាយជាខ្លាំង ដែលត្រូវប្រាប់អ្នកទាំងអស់គ្នាថា ហេតុការណ៍នោះបានក្លាយជាសោកនាដកម្មដ៏អាក្រក់មួយ»។

គួរបញ្ជាក់ថា លោក Chilima វ័យ ៥១ឆ្នាំ បានធ្វើដំណើរទៅដល់ប្រទេសម៉ាឡាវីវិញ នៅថ្ងៃទី៦ ខែមិថុនាបន្ទាប់ពីបានចូលរួមកិច្ចប្រជុំកំពូលកូរ៉េ-អាហ្វ្រិក នៅទីក្រុងសេអ៊ូល កាលពីសប្តាហ៍មុន៕

នៅព្រឹកថ្ងៃអង្គារនេះ កងកម្លាំងការពារម៉ាឡាវីបាននិយាយថា ខ្លួនបានដាក់ពង្រាយយានដ្រូន និងទាហានយ៉ាងហោចណាស់ ២០០នាក់ ដើម្បីស្វែងរកយន្តហោះ នៅឯព្រៃបម្រុង Chikangawa ជាកន្លែងដែលទាក់ទងបានសញ្ញាចុងក្រោយ។ មេបញ្ជាការកងកម្លាំងលោក Paul Valentino Phiri បាននិយាយថា ប្រតិបត្តិការជួយសង្គ្រោះត្រូវបានពន្យារពេលដោយសារលក្ខខណ្ឌអាកាសធាតុមិនសូវល្អ៕