ការិយាល័យសិទ្ធិមនុស្សរបស់អង្គការសហប្រជាជាតិ (UN) នៅថ្ងៃអង្គារ (ទី១១ ខែមិថុនា) បាននិយាយថា ការសម្លាប់ជនស៊ីវិលនៅតំបន់ហ្កាហ្សា អំឡុងពេលប្រតិបត្តិការរបស់អ៊ីស្រាអែល ដើម្បីរំដោះចំណាប់ថ្នូរចំនួន ៤នាក់ និងការឃុំឃាំងក្រុមប្រដាប់អាវុធ នៅក្នុងតំបន់ដែលមានប្រជាជនណែនណាន់តាន់តាប់នេះ អាចស្មើនឹងឧក្រិដ្ឋកម្មសង្គ្រាម។

អ៊ីស្រាអែលបាននិយាយថា ប្រតិបត្តិការនេះ អមដោយការវាយលុកតាមអាកាសផងនោះ បានកើតឡើងកាលពីថ្ងៃសៅរ៍ចុងសប្ដាហ៍កន្លងមក នៅទីតាំងដ៏សំខាន់នៃសង្កាត់លំនៅឋានមួយ ក្នុងតំបន់ Nuseirat នៅភាគកណ្តាលតំបន់ហ្កាហ្សា ជាកន្លែងដែលក្រុមហាម៉ាសបានឃុំចំណាប់ថ្នូរនៅក្នុងផ្ទះល្វែងចំនួន២ ដាច់ដោយឡែកពីគ្នា។ ហើយបើយោងតាមមន្ត្រីសុខាភិបាលតំបន់ហ្កាហ្សា បានឲ្យដឹងថា ប្រតិបត្តិការនេះបានសម្លាប់ជនជាតិប៉ាឡេស្ទីនជាង ២៧០នាក់។

អ្នកនាំពាក្យរបស់ការិយាល័យសិទ្ធិមនុស្ស UN លោក Jeremy Laurence បាននិយាយថា៖ «របៀបនៃការវាយឆ្មក់ ដែលត្រូវបានធ្វើឡើងនៅក្នុងតំបន់មានប្រជាជនយ៉ាងណែនណាន់តាន់តាប់បែបនេះ បានបង្កើតជាសំណួរថា តើគោលការណ៍នៃភាពច្បាស់លាស់ សមាមាត្រ និងការប្រុងប្រយ័ត្ន ដូចដែលបានកំណត់នៅក្រោមច្បាប់នៃសង្គ្រាមនោះ ត្រូវបានគោរពដោយកងកម្លាំងរបស់អ៊ីស្រាអែលដែរ ឬទេ»។

ជាមួយគ្នានេះ លោក Laurence បានបន្ថែមថា ការឃុំចំណាប់ថ្នូរនៅក្នុងតំបន់ដែលមានប្រជាជនច្រើនបែបនេះរបស់ក្រុមប្រដាប់អាវុធ កំពុង «ធ្វើឲ្យជីវិតរបស់ជនស៊ីវិលប៉ាឡេស្ទីន ក៏ដូចជាចំណាប់ថ្នូរខ្លួនឯង ប្រឈមនឹងហានិភ័យបន្ថែមពីអរិភាព»។ លោកបានលើកឡើងថា៖ «សកម្មភាពទាំងអស់នេះរបស់ភាគីទាំង២ ប្រហែលអាចស្មើនឹងឧក្រិដ្ឋកម្មសង្គ្រាម»៕