លោក ហាន់ធឺ បៃដិន (Hunter Biden) កូនប្រុសរបស់លោកប្រធានាធិបតីអាមេរិក ចូ បៃដិន (Joe Biden) ត្រូវបានផ្ដន្ទាទោសដោយគណៈវិនិច្ឆ័យកាលពីថ្ងៃអង្គារ (១១ មិថុនា) ពីបទភូតកុហកអំពីការប្រើប្រាស់គ្រឿងញៀនខុសច្បាប់របស់ខ្លួនដើម្បីទិញកាំភ្លើងខ្លីមួយដើម ដែលធ្វើឱ្យលោកក្លាយជាកូនរបស់ប្រធានាធិបតីអាមេរិកកំពុងកាន់តំណែងដំបូងគេ ដែលត្រូវបានកាត់ទោសពីបទព្រហ្មទណ្ឌ។

គណៈវិនិច្ឆ័យដែលមានសមាជិក ១២ រូបនៅទីក្រុង វីលមីងតុន (Wilmington) រដ្ឋ ដេឡាវែរ (Delaware) ដែលជាស្រុកកំណើតរបស់ក្រុមគ្រួសារត្រកូល បៃដិន បានរកឃើញថា ចុងចោទមានទោសលើបទចោទប្រកាន់ទាំងបីករណីប្រឆាំងនឹងលោក។ លោក ហាន់ធឺ បៃដិន វ័យ ៥៤ ឆ្នាំ បានបង្ហាញប្រតិកម្មរបស់ខ្លួនតិចតួចប៉ុណ្ណោះជុំវិញសាលក្រមនេះ។

មេធាវីការពារក្ដី លោក អាបេ ឡូវែល (Abbe Lowell) បាននិយាយនៅក្នុងសេចក្តីថ្លែងការណ៍មួយថា ពួកគេនឹង «បន្តការប្រឈមផ្លូវច្បាប់ទាំងអស់ដែលមានចំពោះលោក ហាន់ធឺ»។ គួរបញ្ជាក់ថា លោក ហាន់ធឺ បៃដិន នៅតែប្រឈមមុខនឹងបណ្ដឹងពាក់ព័ន្ធនឹងពន្ធលើអាជីវកម្មខ្លួនដាច់ដោយឡែកផ្សេងទៀតនៅរដ្ឋកាលីហ្វ័រនីញ៉ា (California)។ នៅក្នុងការកាត់ក្តី រដ្ឋអាជ្ញាបានផ្តល់នូវអំណះអំណាងនៃការលំបាកជាច្រើនឆ្នាំរបស់លោក ហាន់ធឺ បៃដិន ជាមួយនឹងគ្រឿងស្រវឹង និងគ្រឿងញៀន ដែលពួកគេនិយាយថា រារាំងលោកដោយស្របច្បាប់ពីការទិញកាំភ្លើង។

បន្ទាប់ពីការជំនុំជម្រះប្រហែល ៣ ម៉ោង ចៅក្រមបានរកឃើញថាលោក ហាន់ធឺ ក្លែងបន្លំថាខ្លួនឈប់ប្រើគ្រឿងញៀនខុសច្បាប់ នៅពេលលោកបានបំពេញឯកសារត្រួតពិនិត្យរបស់រដ្ឋាភិបាលសម្រាប់កាំភ្លើងខ្លីប្រភេទ ខូលត៍ ខូប្រា (Colt Cobra) ក្នុងឆ្នាំ២០១៨ ហើយបានកាន់កាប់អាវុធនោះដោយខុសច្បាប់។

ចៅក្រមតំបន់របស់សហរដ្ឋអាមេរិក លោកស្រី ម៉ាយ៉េលែន ណរ៉ីកា (Maryellen Noreika) មិនបានកំណត់កាលបរិច្ឆេទសម្រាប់ការកាត់ទោសនោះទេ ប៉ុន្តែបានបន្ថែមថា ជាធម្មតាវានឹងមានរយៈពេល ១២០ ថ្ងៃបន្ទាប់ពីសាលក្រម។ កាលបរិច្ឆេទនោះនឹងមិនលើសពីមួយខែ មុនការបោះឆ្នោតប្រធានាធិបតីសហរដ្ឋអាមេរិកថ្ងៃទី០៥ ខែវិច្ឆិកា ឡើយ៕