ពោធិ៍សាត់៖ បន្ទាប់ពីប្រកាសចូលកាន់មុខតំណែងជាផ្លូវការ កាលពីថ្ងៃទី១១ ខែមិថុនា ឆ្នាំ​២០២៤ ក្រុមប្រឹក្សាខេត្តពោធិ៍សាត់ អាណត្តិទី៤ ទាំង២១រូប បានអញ្ជើញធ្វើពិធីបួងសួង សុំ​សេចក្ដីសុខសេចក្ដីចម្រើន ពីលោកឧកញ៉ា ឃ្លាំង មឿង និងជំទាវ ខាន់ ខៀវ ដើម្បីសុំ​ការ​អនុញ្ញាត​ចូល​បម្រើ​ការងារ ជាសមាជិកក្រុមប្រឹក្សាខេត្ត ក្នុងអាណត្តិទី៤ ។

ពិធីនេះក៏​មានការអញ្ជើញចូលរួមពីលោក លឹម សុខតូ អភិបាលរងខេត្ត កងកម្លាំងប្រដាប់អាវុធ និងថ្នាក់ដឹកនាំមន្ទីរ-អង្គភាពមួយ​ចំនួនផងដែរ។

កម្មវិធីបានដំណើរការទៅតាមទំនៀមទំលាប់ ដោយមានរៀបចំរណ្ដាប់សែនព្រេនគ្រប់មុខ មាន​ទាំង​ម្ហូបអាហារ ស្លាម្លូ នំចំណី ផ្លែឈើ ភេសជ្ជៈ ព្រមទាំងធ្វើពិធីថ្វាយទៀនធូប ផ្កាភ្ញី ប្រេងម្ស៉ៅ និង​​ប្រោះព្រំសុគន្ធវារី រំលឹកដល់វិញ្ញានក្ខន្ធអ្នកឧកញ៉ា ឃ្លាំង មឿង និងលោកជំទាវ ខាន់ ខៀវ មាន​បារមី​ខ្លាំង​ពូកែស័ក្កសិទ្ធ មកស្ថិតនៅផ្ដល់សេចក្ដីសុខសេចក្ដីចម្រើន ដល់ឯកឧត្តម លោកជំទាវ សមាជិក​ក្រុមប្រឹក្សាខេត្តពោធិ៍សាត់ទាំង២១រូប ក៍ដូចជាឯកឧត្តម លោកជំទាវ លោក លោកស្រី ថ្នាក់​ដឹកនាំខេត្តទាំងអស់ មានសុខភាពល្អ ជួបតែសេចក្ដីសុខ និងសម្រេចជោគជ័យគ្រប់ភារកិច្ច និង​បួងសួងសុំឲ្យបារមីលោកឧកញ៉ា ឃ្លាំង មឿង និងលោកជំទាវ ខាន់ ខៀវ តាម​ជួយ​ថែ​រក្សា​ប្រជាពលរដ្ឋ​ក្នុងខេត្តពោធិ៍សាត់ឱ្យមានសេចក្ដីសុខសេចក្ដីចម្រើន មានលាភយសសក្កិ ប្រជា​ពលរដ្ឋ​មាន​មុខរបរ បង្កបង្កើនផលទទួលបានភោគផលគ្រប់ទីកន្លែង និងចៀសផុត​ពី​ជំងឺ​កាច​សាហាវ​ផ្សេងៗ។ ហើយក្រុមប្រឹក្សាខេត្តពោធិ៍សាត់អាណត្តិទី៤ ទាំង២១រូប សូមធ្វើការប្តជ្ញា ខិតខំ​ជំរុញ និងបំពេញភារកិច្ចដើម្បីបម្រើផលប្រយោជន៍ជូនប្រជាពលរដ្ឋ និងចូលរួម​ការ​អភិវឌ្ឍ​មូលដ្ឋាន​ខេត្តពោធី៍សាត់ឱ្យកាន់តែរីកចម្រើន ប្រកបដោយតម្លាភាព និងគណនេយ្យភាព​ដោយ​ផ្ទាល់​ចំពោះ​ប្រជាពលរដ្ឋ ធានាបានការអភិវឌ្ឍតាមបែបប្រជាធិបតេយ្យ នៅក្នុងដែន​សមត្ថកិច្ច​របស់ខ្លួន៕ អត្ថបទ និងរូបភាព ៖ ភិរុណ ពៅ