កំពង់ឆ្នាំង៖ ក្នុងពិធីប្រកាសចូលកាន់តំណែងក្រុមប្រឹក្សាខេត្តកំពង់ឆ្នាំង នៅព្រឹកថ្ងៃទី១២ ខែ​មិថុនា ឆ្នាំ២០២៤នេះ ឯកឧត្តម ស៊ីវ រុន ប្រធានក្រុមប្រឹក្សាខេត្តកំពង់ឆ្នាំង បានប្តេជ្ញា​ចិត្ត​ក្នុង​អាណត្តិទី៤​នេះ សមាជិកក្រុមប្រឹក្សាទាំង២៣រូបត្រូវធ្វើការទ្វេរដងពីអាណត្តិទី៣ ដោយ​ពង្រឹង​របៀប​ធ្វើការងារ ដើម្បីលើកកម្ពស់ការទទួលខុសត្រូវរបស់​មន្រ្តី​នៅ​ក្នុងការបំពេញតួនាទី ភារកិច្ច​របស់ខ្លួនសំដៅអភិវឌ្ឍមូលដ្ឋាន និងឆ្លើយតបចំពោះតម្រូវការរបស់ប្រជាពលរដ្ឋ គឺធ្វើ​ឲ្យ​សម្រេច​គោល​ដៅមូលដ្ឋានមានការអភិវឌ្ឍ និងជីវភាពរស់នៅ​របស់​ប្រជាពលរដ្ឋ​មាន​ការ​ប្រសើរ​ឆ្ពោះ​ទៅ​ប្រទេស​មាន​ចំណូលមធ្យមកម្រឹតខ្ពស់នៅឆ្នាំ២០៣០។

ឯកឧត្តម ស៊ីវ រុន ប្រធានក្រុមប្រឹក្សាខេត្តបានថ្លែងបន្តថា ការពង្រឹងសាមគ្គីភាព ឯកភាពផ្ទៃក្នុង ឲ្យ​បានល្អនៅក្នុងក្រុមប្រឹក្សា គណៈអភិបាលខេត្ត មន្រ្តីរាជការ និងកងកម្លាំងគ្រប់លំដាប់ថ្នាក់ ដោយ​ឈរលើមូលដ្ឋានលើកកម្ពស់ប្រសិទ្ធភាពការងារ ការគោរពច្បាប់ គោលការណ៍​នានា​របស់​រដ្ឋ។ ក្រុមប្រឹក្សាខេត្ត បានគិតពីគោលដៅរួមគ្នាក្នុងការផ្តល់សេវាសាធារណៈ ធានា​សន្តិសុខ​សុវត្ថិភាព លើកកម្ពស់ជីវភាពប្រជាពលរដ្ឋ និងកាត់បន្ថយភាពក្រីក្រ ស្របតាមយុទ្ធសាស្ត្រ​បញ្ចកោណ​របស់រាជរដ្ឋាភិបាល។

ឯកឧត្តម អ៊ុក រ៉ាប៊ុន ទេសរដ្ឋមន្ត្រី ទទួលបន្ទុកបេសកកម្មពិសេស និងជាប្រធានក្រុមប្រឹក្សាស្តារ អភិវឌ្ឍន៍​វិស័យកសិកម្ម និងជនបទ បានថ្លែងអបអរសាទរកោតសរសើរ និងវាយតម្លៃ​ខ្ពស់​ចំពោះ​សមាជិក សមាជិកាក្រុមប្រឹក្សាខេត្តកំពង់ឆ្នាំង ដែលត្រូវបានតំណាងប្រជាពលរដ្ឋ គឺ​សមាជិក​ក្រុម​ប្រឹក្សា​ឃុំ-សង្កាត់ បោះឆ្នោតផ្តល់សេចក្តីទុកចិត្ត ដើម្បីខិតខំបន្តដឹកនាំខេត្តកំពង់ឆ្នាំង ឲ្យបន្ត​រីក​ចម្រើន​លើ​គ្រប់វិស័យបន្ថែមទៀត ដោយត្រូវតែខិតខំបម្រើផលប្រយោជន៍ និងសេចក្តី​ត្រូវ​ការ​របស់​ប្រជាពលរដ្ឋ​ទាំងអស់ដោយស្មើភាព យុត្តិធម៌ និងមិនប្រកាន់និន្នាការនយោបាយអ្វីឡើយ ៕ កាំង ហុងវាស្នា