អធិការបតីអាល្លឺម៉ង់ លោក អូឡាហ្វ សូល (Olaf Scholz) បានបង្ហាញសុទិដ្ឋិនិយមយ៉ាងប្រុងប្រយ័ត្នអំពីសន្និសីទសន្តិភាពសម្រាប់អ៊ុយក្រែន ដែលនឹងត្រូវធ្វើឡើង នៅប្រទេសស្វ៊ីស នៅចុងខែនេះ។

លោក សូល បានថ្លែងកាលពីថ្ងៃអង្គារក្នុងសន្និសីទសារព័ត៌មានរួមគ្នា ជាមួយប្រធានាធិបតីអ៊ុយក្រែន លោក វ្ល៉ូឌីមី ហ្ស៊េឡិនស្គី ( Volodymyr Zelensky) នៅទីក្រុងប៊ែរឡាំងថា៖« យើងនឹងពិភាក្សាអំពីគោលការណ៍សម្រាប់សន្តិភាពដ៏ត្រឹមត្រូវ និងយូរអង្វែង នៅទីនោះ»។

លោក បាននិយាយថា៖«ទាំងនេះ មិនទាន់ជាការចរចាអំពីការបញ្ចប់សង្គ្រាមទេ ពីព្រោះសម្រាប់ [ប្រធានាធិបតីរុស្ស៊ី វ្ល៉ាឌីមៀ] ពូទីន ត្រូវតែបង្ហាញថា លោក ត្រៀមខ្លួនរួចរាល់ហើយ ដើម្បីបញ្ចប់យុទ្ធនាការដ៏ឃោរឃៅរបស់ខ្លួន និងដកទ័ពចេញ»។

លោក សូល បានបន្ថែមថា៖«ប៉ុន្តែប្រហែលជាវិធីមួយ អាចត្រូវបានរកឃើញ ដើម្បីចាប់ផ្តើមដំណើរការមួយក្នុងអំឡុងពេលដែលប្រទេសរុស្ស៊ី នឹងនៅថ្ងៃណាមួយ ក៏នឹងអង្គុយនៅតុចរចាផងដែរ»។

អធិការបតីអាល្លឺម៉ង់រូបនេះ បានសង្កត់ធ្ងន់ថា មានតែអ៊ុយក្រែនទេ ដែលនឹងសម្រេចចិត្តថា ពេលណាត្រូវធ្វើការទំនាក់ទំនងជាមួយរុស្ស៊ី ហើយនឹងមិនបង្ខំឲ្យធ្វើសម្បទានដ៏ធំដោយអ្នកគាំទ្ររបស់ខ្លួនឡើយ។ លោក បានបន្តថា ប្រទេសអាល្លឺម៉ង់ នឹងនៅខាងអ៊ុយក្រែនយ៉ាងរឹងមាំ។

លោក សូល បានបញ្ជាក់ថា ដរាបណា លោក ពូទីន បន្តស្វែងរកគោលដៅសង្រ្គាមរបស់ខ្លួន «សាររបស់យើង គឺថា យើងនឹងមិនបោះបង់ការគាំទ្ររបស់យើងសម្រាប់អ៊ុយក្រែនទេ»។