នៅសល់តែ៣ថ្ងៃទៀតប៉ុណ្ណោះ ក្រសួងការងារ និងបណ្តុះបណ្តាលវិជ្ជាជីវៈ នឹងរៀបចំកម្ម​វិធី​ទិវា​ជាតិ​អប់រំ​បណ្តុះបណ្តាលបច្ចេកទេស និងវិជ្ជាជីវៈលើកទី៧ ក្រោមប្រធានបទ «TVET រៀនឱ្យចប់ ឱ្យចេះ ឱ្យមានការងារ» រយៈពេល២ថ្ងៃ ពីថ្ងៃទី១៥ និង១៦ ខែមិថុនា ឆ្នាំ២០២៤នេះ នៅ​មជ្ឈ​មណ្ឌល​សន្និបាត និងពិព័រណ៍កោះពេជ្រ។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅ​ក្នុង​សន្និសីទសារព័ត៍មាន ទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៧ នៅ​ព្រឹក​ថ្ងៃទី១២ ខែមិថុនានេះ បានមានប្រសាសន៍ថា ទិវាជាតិនេះ នឹងមានការដាក់តាំងបង្ហាញ និង​ការ​ប្រកួត​ប្រជែងនូវស្នាដៃរបស់សិស្ស និស្សិត ដែលមាន គំនិតច្នៃប្រឌិត នវានុវត្តន៍ ពាក់​ព័ន្ធ​នឹង​វិស័យ​អប់រំ​បណ្តុះបណ្តាលបច្ចេកទេស និងវិជ្ជាជីវៈ វិស័យឯកជន និងវិស័យពាក់ព័ន្ធនានា និង​អាច​ប្រើ​ប្រាស់ដើម្បីជាប្រយោជន៍ដល់ការសិក្សាស្រាវជ្រាវ បម្រើដល់ការងារសង្គម វិស័យ កសិកម្ម ពាណិជ្ជកម្ម សំណង់ និងឧស្សាហកម្ម ដោយត្រូវឆ្លង​កាត់​ការ​វាយ​តម្លៃ​ពី​គណៈកម្មការរៀបចំ​ការ​ប្រកួត និងការបោះឆ្នោតលើភាពពេញចិត្តពីសំណាក់អ្នកចូលរួមទស្សនា។

បើតាមឯកឧត្តម ហ៊ីង ស៊ីដេត អគ្គនាយកអប់រំបណ្តុះបណ្តាលបច្ចេកទេស និងវិជ្ជាជីវៈ បាន​លើក​ឡើង​ថា ​គោលបំណងសំខាន់នៃការរៀបចំទិវាជាតិនេះឡើង ដើម្បីផ្សព្វផ្សាយអំពីសារៈសំខាន់ នៃ​ការ​អប់រំបណ្តុះបណ្តាលបច្ចេកទេស និងវិជ្ជាជីវៈ និងដើម្បីទាក់ទាញឲ្យសាធារណជន ក៏ដូចជា​លើក​ទឹកចិត្ត​ដល់មាតាបិតា និងអាណាព្យាបាល ចូលរួមជំរុញ​លើក​ទឹកចិត្ត​ឲ្យ​កូន​ងាក​មក​រៀន​ជំនាញ​បច្ចេកទេស និងវិជ្ជាជីវៈកាន់តែច្រើនឡើងថែមទៀត ដើម្បីឆ្លើយតបតម្រូវ​ការ​ទីផ្សារ​ការងារ​បច្ចុប្បន្ន និងទៅថ្ងៃអនាគត៕