អាហ្វហ្គានីស្ថាន៖ សហរដ្ឋអាមេរិក និងចក្រភពអង់គ្លេសកំពុងប្រញាប់ប្រញាល់បញ្ជូនកងកម្លាំង ទៅកាន់រដ្ឋធានីកាប៊ុលដើម្បីជួយជម្លៀសអ្នកការទូត ទាហាន និងពលរដ្ឋ ព្រមទាំងប្រជាជនអាហ្វហ្គានីស្ថានរាប់ពាន់នាក់ដែលបានធ្វើការជាមួយពួកគេ ខណៈដែលពួកតាលីបង់វាយសម្រុកឆ្ពោះទៅកាន់រដ្ឋធានីនេះ។
មន្ទីរបញ្ចកោណបានប្រកាសថា ខ្លួននឹងបញ្ជូនកងវរសេនាតូចចំនួន ៣កងដែលមានទាហានប្រហែល ៣.០០០នាក់ទៅកាន់អាកាសយានដ្ឋានអន្តរជាតិកាប៊ុលក្នុងរយៈពេល ២៤ ទៅ ៤៨ម៉ោងនៅក្នុងសេចក្ដីប្រកាសកាលពីថ្ងៃព្រហស្បតិ៍។ អ្នកនាំពាក្យក្រសួងការពារជាតិ លោក John Kirby បាននិយាយថា ការបន្ថែមកងកម្លាំងនេះនឹងជួយ “ការពារដល់សុវត្ថិភាព និងសណ្ដាប់ធ្នាប់” ចំនួនជនជាតិអាមេរិក និងអាហ្វហ្គានីស្ថានដែលបានធ្វើការជាមួយជនជាតិអាមេរិក ដូច្នេះពួកគេត្រូវបានទទួលទិដ្ឋាការអន្តោប្រវេសន៍ពិសេស។
ចក្រភពអង់គ្លេសបាននិយាយថា ខ្លួននឹងបញ្ជូនកងទ័ពចំនួន ៦០០នាក់ ហើយរដ្ឋមន្ត្រីការពារជាតិ លោក Ben Wallace បាននិយាយថា ចក្រភពអង់គ្លេសកំពុងផ្លាស់ប្ដូរស្ថានទូតរបស់ខ្លួនពីជាយក្រុងតំបន់បៃតង ទៅកាន់ទីតាំងដែលមានសុវត្ថិភាពជាងនេះនៅកណ្ដាលរដ្ឋធានី។ អ្នកការទូត និងទាហានចក្រភពអង់គ្លេសចំនួន ២០០នាក់កំពុងត្រូវបានជម្លៀសចេញ ប៉ុន្តែចំនួនជាក់លាក់មិនត្រូវបានបញ្ជាក់ទេ។ អង់គ្លេសរំពឹងថា នឹងជម្លៀសប្រជាជនអាហ្វហ្គានីស្ថានដែលមានសិទ្ធិដល់ទៅ ៤.០០០នាក់ផងដែរ។ រដ្ឋាភិបាលបស្ចិមប្រទេសផ្សេងទៀតក៏កំពុងពន្លឿនផែនការ សម្រាប់ការជម្លៀសបុគ្គលិកស្ថានទូតផងដែរ ស្របពេលមានក្ដីបារម្ភចំពោះការវាយសម្រុកទៅមុខ ដោយមិនរុញរារបស់ពួកតាលីបង់នៅទូទាំងប្រទេស៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
