រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ស្នើដល់រដ្ឋាករទឹក​សាធារណៈ​ទាំងអស់ ពិចារណាលើថ្លៃសេវា ភ្ជាប់បណ្តាញទឹកស្អាតជូនប្រជាពលរដ្ឋ ឲ្យ​ស្ថិត​ក្នុង​តម្លៃ​មួយ​សម​រម្យ និងជំរុញពង្រីកបណ្តាញទៅកាន់រោងចក្រ សហគ្រាស និង សណ្ឋាគារជាដើម ដើម្បីស្វែ​ង​រក​ប្រភពចំណូលបន្ថែម។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើក​ឡើង​នៅ​ក្នុង​ពិធីប្រកាស សមាសភាពប្រធានក្រុមប្រឹក្សាភិបាលនៃរដ្ឋាករទឹកចំនួន ៦ នាថ្ងៃម្សិល​មិញ​នេះ​ថា រដ្ឋាករទឹក ជាពិសេសអគ្គនាយកទាំងអស់ ត្រូវមាន គណនេយ្យភាព និងការ​ទទួល​ខុស​ត្រូវ​ខ្ពស់ ក្នុងការដឹកនាំចាត់ចែងប្រតិបត្តិការប្រចាំថ្ងៃ នៃអាជីវកម្មរបស់ខ្លួន ហើយ​ត្រូវ​រាយការណ៍ ជាប្រចាំអំពីលទ្ធផល ក្នុងនោះត្រូវពង្រឹងប្រសិទ្ធភាពក្នុងកិច្ចដំណើរការ និងគ្រប់​គ្រង​សហគ្រាស តាមរយៈការបង្កើតនិងអនុវត្តតាម ស្តង់ដាប្រតិបត្តិ ខណៈដែលបច្ចុប្បន្ន រដ្ឋាករ​ទឹក​ស្វយ័ត​ក្រុង​ភ្នំពេញ បានដំណើរការការងារនេះជាយូរមកហើយ ដែលអាចចែករំលែក និងរៀន​សូត្រ​ពីគ្នាទៅវិញទៅមកបាន។

ចំណែកការភ្ជាប់បណ្តាញចូលខ្នងផ្ទះ, ឯកឧត្តមរដ្ឋមន្ត្រី ស្នើរដល់រដ្ឋាករទឹកសាធារណៈទាំងអស់ ពិចារណាលើថ្លៃសេវាភ្ជាប់ បណ្តាញទឹកស្អាតជូនប្រជាពលរដ្ឋ ប្រកបដោយភាពច្នៃប្រឌិតខ្ពស់ ពី​ព្រោះ​ការបង់ថ្លៃភ្ជាប់បណ្តាញក្នុងរង្វង់ ៣០ម៉ឺន ៤០ ឬ៥០ ម៉ឺន រៀល សម្រាប់ប្រជាពលរដ្ឋ​គឺ​ជា​កញ្ចប់​ថវិកា​មួយធំណាស់សម្រាប់ពួកគាត់ ដូច្នេះត្រូវគិតគូរឡើងវិញ ហើយសូមកុំឲ្យការថ្លៃភ្ជាប់ បណ្តាញ​នេះជាបញ្ហា។ ដើម្បីជំរុញការតភ្ជាប់ឲ្យដំណើររលូន, រដ្ឋាករទឹកស្អាត​គួរ​បញ្ជូល​ថ្លៃ​សេវា​នេះ​ទៅ​ក្នុង​វិក្ក័យបត្រ សម្រាប់ការបង់ រយៈពេលវែង និងមានចំនួនទាបបំផុត ធ្វើយ៉ាងណា​ឲ្យ​ប្រជាពលរដ្ឋ​មានលទ្ធភាព និងទទួលបានទឹកស្អាតប្រើប្រាស់ មានគុណភាព សុវត្ថិភាព និរន្តរភាព និងថ្លៃសមរម្យ។

ជុំវិញការតបណ្តាញនេះដែរ ឯកឧត្តម ហែម វណ្ណឌី សូមឲ្យថ្នាក់ដឹកនាំ មន្រ្តីនៅតាម​រដ្ឋាករទឹក​សាធារណៈ​ទាំងអស់ ខិតខំច្នៃ ប្រឌិត ការស្វែរកតបណ្តាញទៅកាន់បណ្តារោងចក្រ សហគ្រាស​មួយ​ចំនួន ជាពិសេសសណ្ឋាគារ ដូចជានៅខេត្តរៀមរាបជាដើម ដើម្បី ឲ្យពួកគេ​ទទួល​បាន​ទឹក​ស្អាត​ប្រើ​ប្រាស់ និងការជាការទាញយកចំណូលពីផ្នែកនោះបន្ថែមផងដែរ។ សម្រាប់បញ្ហានេះដែរ, ក្រសួង​បាន កំពុងសិក្សាបង្កើត “រដ្ឋាករទឹកកម្ពុជា” ដើម្បីពង្រឹង និងពង្រីកតួនាទីរបស់រដ្ឋ ក៏ដូចជា​ពង្រឹង​អ​ធិបតេយ្យភាពរបស់រដ្ឋ និងប្រសិទ្ធភាព ការផ្តល់​សេវា​សាធារណៈ​ដ៏​មាន​សារសំខាន់​មួយ​នេះ ហើយបច្ចុប្បន្នក្រសួងកំពុងសិក្សាក្នុងការបង្កើតឲ្យមាន និយ័តករទឹកស្អាត ដែល នឹង​ដើរ​តួនាទី​ជានិយ័តករក្នុងវិស័យទឹកស្អាតនេះ៕ អត្ថបទ៖ សុន រ៉ាឌី