ប្រធានាធិបតីអាមេរិក លោក ចូ បៃដិន (Joe Biden) បាននិយាយថា លោកនឹងគោរពការសម្រេចរបស់គណៈវិនិច្ឆ័យក្នុងការផ្ដន្ទាទោសឱ្យកូនប្រុសរបស់លោកពីបទព្រហ្មទណ្ឌពាក់ព័ន្ធនឹងការកាន់កាប់កាំភ្លើងដោយខុសច្បាប់ បន្ទាប់ពីការកាត់ក្តីរយៈពេលមួយសប្តាហ៍ ដែលបានផ្តល់ពេលវេលាដ៏ច្របូកច្របល់សម្រាប់គ្រួសារប្រធានាធិបតី។

គណៈវិនិច្ឆ័យចំនួន ១២ រូបបានរកឃើញថាលោក ហាន់ធឺ បៃដិន (Hunter Biden) វ័យ ៥៤ ឆ្នាំមានទោសពីបទភូតកុហកលាក់បាំងអំពីការប្រើប្រាស់គ្រឿងញៀនរបស់ខ្លួននៅក្នុងឯកសារទិញកាំភ្លើងខ្លីកាលពីឆ្នាំ២០១៨។ លោកប្រឈមមុខនឹងលទ្ធភាពនៃការជាប់ពន្ធនាគារបន្ទាប់ពីសាលក្រម ដែលជាការកាត់ទោសព្រហ្មទណ្ឌជាលើកដំបូងលើកូនរបស់ប្រធានាធិបតីកំពុងកាន់តំណែង។

ការផ្តន្ទាទោសរបស់លោក ហាន់ធឺ លើបទព្រហ្មទណ្ឌទាំងបីករណីនេះ កើតឡើងនៅពេលដែលលោកប្រធានាធិបតី បៃដិន ធ្វើយុទ្ធនាការសម្រាប់ការបោះឆ្នោតឡើងវិញក្នុងខែវិច្ឆិកា ហើយតិចជាងពីរសប្តាហ៍បន្ទាប់ពីគូប្រជែងបោះឆ្នោតគឺលោក ដូណាល់ ត្រាំ (Donald Trump) ត្រូវបានកាត់ទោសពីបទព្រហ្មទណ្ឌនៅទីក្រុងញូវយ៉ក (New York)។

ខណៈពេលដែលលោកប្រធានាធិបតី បៃដិន មិនបានទៅចូលរួមការកាត់ក្តីនៅរដ្ឋ ដេឡាវែរ (Delaware) សមាជិកគ្រួសារជាច្រើនរួមទាំងស្រី្តទីមួយ គឺលោកស្រី ជីល បៃដិន (Jill Biden), ភរិយារបស់លោក ហាន់ធឺ និងសាច់ញាតិផ្សេងទៀតមានវត្តមាននៅទីនោះ ដើម្បីគាំទ្រលោកក្នុងអំឡុងពេលដំណើរការនីតិវិធី។ សាលក្រមកាលពីថ្ងៃអង្គារ បានជំរុញឱ្យមានប្រតិកម្មនយោបាយភ្លាមៗ រួមទាំងពីបណ្ដាសមាជិកគណបក្សសាធារណរដ្ឋនៅក្នុងសភា ដែលបានចំណាយពេលជាច្រើនឆ្នាំក្នុងការស៊ើបអង្កេតទំនាក់ទំនងអាជីវកម្មរបស់លោក ហាន់ធឺ បៃដិន ទៅនឹងឪពុករបស់ខ្លួន៕