ភ្នំពេញ៖ រាជរដ្ឋាភិបាលកម្ពុជា តាមរយៈក្រសួងមហាផ្ទៃ និងស្ថាប័នពាក់ព័ន្ធ មានយុទ្ធសាស្ត្រថ្មីមួយ ដើម្បីប្រយុទ្ធប្រឆាំងនឹងបញ្ហាគ្រឿងញៀន គឺកំពុងរៀបចំនូវប្រព័ន្ធទិន្នន័យ គ្រប់គ្រងអ្នកពាក់ព័ន្ធនឹងសារធាតុញៀន ដោយប្រមូលទិន្នន័យ ការកំណត់អត្តសញ្ញាណរបស់ពួកគេ ហើយក៏មានឈានទៅដល់ឋ បន្ថយនូវសិទ្ធិមួយចំនួន របស់អ្នកប្រព្រឹត្តិបទល្មើសគ្រឿងញៀនទាំងនោះផងដែរ ។ 

លោក ទូច សុខៈ អ្នកនាំពាក្យក្រសួងមហាផ្ទៃ បានឲ្យដឹងថា ប្រព័ន្ធទិន្នន័យគ្រប់គ្រងអ្នកពាក់ព័ន្ធសារធាតុញៀន រហូតមកដល់ពេលនេះ សម្រេចការរៀបចំតម្លើង បានប្រមាណជាង ៩០ភាគរយហើយ គ្រោងនឹងដាក់ឲ្យដំណើរការ នាពេលឆាប់ៗខាងមុខ ដើម្បីងាយស្រួលដល់ការប្រយុទ្ធប្រឆាំង នឹងបញ្ហាគ្រឿងញៀន ។

លោកបន្តថា សម្រាប់គោលបំណង នៃការរៀបចំប្រព័ន្ធនេះឡើង ដើម្បីប្រមូលទិន្នន័យអ្នកពាក់ព័ន្ធគ្រឿងញៀន មានទាំងប្រើប្រាស់ ជួញដូរ រក្សាទុក ចរាចរចែកចាយផ្សេងៗ ដើម្បីលើកផែនការប្រយុទ្ធប្រឆាំងនឹងគ្រឿងញៀន មួយទៀតដើម្បីកំណត់ចំណាំបុគ្គលពាក់ព័ន្ធ ក្នុងការដាក់ទណ្ឌកម្មពួកគេ មានទាំងផ្នែករដ្ឋបាលផ្សេងៗ បន្ថយសិទ្ធិមួយចំនួន ហើយប្រព័ន្ធនេះ ក៏អាចជួយបំភ័យ អ្នកពាក់ព័ន្ធគ្រឿងញៀនទាំងអស់នោះ ឲ្យមានការខ្លាចរអា មិនប្រព្រឹត្តិបទល្មើសគ្រឿងញៀននេះ ។

គ្រឿងញៀន គឺជាបញ្ហាចម្បងមួយ ដែលរាជរដ្ឋាភិបាល អាណត្តិទី៧ កំពុងមានការគិតគូរយ៉ាងខ្លាំង ហើយមិនត្រឹមតែប៉ុណ្ណោះ សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានដាក់ចេញយុទ្ធនាការបោសសំអាតបញ្ហាគ្រឿងញៀននៅតាមក្រសួងស្ថាប័នរដ្ឋ គឺត្រូវមានការពិនិត្យរកសារធាតុញៀន លើមន្ត្រីរាជការ ហើយបើរកឃើញមន្ត្រីណាមានជាប់ពាក់ព័ន្ធ គឺត្រូវដកចេញពីក្របខណ្ឌ ។ ជាការកត់សម្គាល់ បន្ទាប់ពីបទបញ្ជាដាច់ណាត់នេះ តាមក្រសួងស្ថាប័ន បានពិនិត្យរកសារធាតុញៀនមន្ត្រីរាជការ ក្នុងស្ថាប័នរបស់ខ្លួនជាបន្តបន្ទាប់ ហើយបានរកឃើញជាហូរហែរ និងត្រូវបានដកចេញពីក្របខណ្ឌ ។

គួរបញ្ជាក់ថា ឆ្នាំ២០២៣កន្លងទៅនេះ កម្លាំងសមត្ថកិច្ច បង្ក្រាបបទល្មើសគ្រឿងញៀន បានចំនួន ៧ពាន់ករណី ហើយរឹបអូសបាននូវសាធាតុញៀនខុសច្បាប់ បានចំនួនជាង ៣តោនផងដែរ ៕ អត្ថបទ៖ បាន សុខរិទ្ធិ