នាយករដ្ឋមន្ត្រីអង់គ្លេស លោក Rishi Sunak កាលពីថ្ងៃអង្គារ បានសន្យាថានឹងកាត់បន្ថយពន្ធ និងកាត់បន្ថយជនអន្តោប្រវេសន៍ ខណៈលោកចាប់ផ្តើមកម្មវិធីនយោបាយសម្រាប់ការបោះឆ្នោតសកលរបស់គណបក្សអភិរក្សនិយម។ លោក Sunak បាននិយាយដោយបង្ហាញផែនការរបស់គណបក្ស Tories សម្រាប់អាណត្តិទី៥ ជាប់ៗគ្នា នៅក្នុងការកាន់តំណែង។

គណបក្សអភិរក្សនិយម បានសន្យាថានឹងកាត់បន្ថយចំនួនប្រាក់ធានារ៉ាប់រងជាតិ ដែលបង់ដោយនិយោជិត ប្រសិនបើគណបក្សនេះជាប់ឆ្នោតថ្មី។

យើងនឹងកាត់បន្ថយការធានារ៉ាប់រងជាតិរបស់និយោជិត ដល់៦ ភាគរយនៅខែមេសា ឆ្នាំ២០២៧ មានន័យថាយើងនឹងកាត់បន្ថយពាក់កណ្តាលពី១២ភាគរយ ចាប់ពីដើមឆ្នាំនេះ។ 

សេចក្តីថ្លែងការណ៍បាននិយាយថា គណបក្ស នឹងធ្វើការដើម្បីលុបចោលការធានារ៉ាប់រងជាតិទាំងស្រុង នៅពេលដែលគណបក្សមានលទ្ធភាពក្នុងការធ្វើដូច្នេះ។ គណបក្ស ក៏បានសន្យាលុបចោលពន្ធប្រថាប់ត្រាទាំងស្រុង សម្រាប់អ្នកទិញដំបូងលើអចលនទ្រព្យរហូតដល់តម្លៃ ៤២៥.០០០ ផោនអង់គ្លេស។

ចក្រភពអង់គ្លេស នឹងរៀបចំការបោះឆ្នោតសកលរបស់ខ្លួននៅថ្ងៃទី៤ ខែកក្កដា។

លោក Sunak និងគណបក្សរបស់លោក ក៏បានព្យាយាមទាក់ទាញអ្នកបោះឆ្នោតដោយសន្យាថា នឹងកាត់បន្ថយជនអន្តោប្រវេសន៍ផងដែរ។