កាលពីថ្ងៃអង្គារម្សិលមិញ ប្រធានាធិបតីអ៊ុយក្រែនលោក Volodymyr Zelensky បានធ្វើដំណើរទៅកាន់កងពលលេខ ២១ នៃក្រុមបាញ់មីស៊ីលពីដីទៅលើអាកាស ស្ថិតក្នុងទីក្រុង Sanitz ប្រទេសអាល្លឺម៉ង់ ហើយលោកបានជួបជាមួយទាហានអ៊ុយក្រែនដែលកំពុងហ្វឹកហាត់ពីរៀបប្រតិបត្តិការប្រព័ន្ធការពារដែនអាកាស Patriot ។

 អមដំណើរដោយរដ្ឋមន្រ្តីការពារជាតិអាល្លឺម៉ង់លោក Boris Pistorius លោក Zelensky បានពិនិត្យអាគុយរបស់ប្រព័ន្ធមីស៊ីល Patriot ផងដែរ ដែលគ្រោងនឹងផ្តល់ជូនប្រទេសអ៊ុយក្រែន ។

 នៅពេលព្រឹកថ្ងៃដដែលនោះ អធិការបតីអាល្លឺម៉ង់លោក Olaf Scholz និយាយថា ទីក្រុងប៊ែរឡាំង នឹងចែកចាយប្រព័ន្ធមីស៊ីល Patriot លើកទី ៣របស់ខ្លួនដល់ប្រទេសអ៊ុយក្រែន ក្នុងរយៈពេលប៉ុន្មានសប្តាហ៍ ឬប៉ុន្មានខែខាងមុខនេះ ដើម្បីពង្រឹងប្រព័ន្ធការពារដែនអាកាសអ៊ុយក្រែន ជាការប្រឈមនឹងការវាយប្រហារតាមច្រកអាកាសរបស់រុស្ស៊ី ។

 សូមបញ្ជាក់ថា អ៊ុយក្រែនប្រតិបត្តិការប្រព័ន្ធមីស៊ីល Patriot យ៉ាងហោចចំនួន ២ដែលផ្គត់ផ្គង់ដោយអាល្លឺម៉ង់ និងប្រព័ន្ធមីស៊ីលការពារដែនអាកាសចំនួន ១ ដែលផ្តល់ជូនដោយសហរដ្ឋអាមេរិក ។

 កាលពីមុន ប្រទេសហូឡង់ បានផ្គត់ផ្គង់ជើងទម្របាញ់មីស៊ីលចំនួន ២ និងបានបង្កើតបណ្តើមគំនិត ដើម្បីរួមគ្នាផ្គត់ផ្គង់ប្រព័ន្ធការពារដែនអាកាសថ្មីលក្ខណៈពេញលេញ ដោយមានកិច្ចសហប្រតិបត្តិការជាមួយប្រទេសដៃគូដទៃទៀត ៕