នៅពេលដែលអគ្គិសនី បានដាច់ ហើយជណ្តើរយន្ត ឈប់ដំណើរការ ប្តីប្រពន្ធជនជាតិអ៊ុយក្រែន អ្នកស្រី Maryna និង លោក Valeriy Tkalich បានទុករទេះរុញនៅជាន់ផ្ទាល់ដី ហើយពរកូនប្រុសអាយុ ២ខែរបស់ពួកគេ ឡើងទៅអាផាតមិនជាន់ទី១២របស់ពួកគេ ជំនួសវិញ។

ចំណែកនៅពេលដែលអាជ្ញាធរក្នុងទីក្រុងគីវ បានជូនដំណឹងដល់អ្នកស្រុកអំពីការដាច់ចរន្តអគ្គិសនី ដែលបានគ្រោងទុកនាពេលខាងមុខ លោក Tkalich បានប្រញាប់ប្រញាល់ងូតទឹកឲ្យកូនតូចរបស់ខ្លួន និងរៀបចំអាហារសម្រាប់គ្រួសារ មុនពេលភ្លើងរលត់ និងទឹកម៉ាស៊ីន លែងដំណើរការ។

ដំណើរការរអាក់រអួលបែបនេះ កំពុងក្លាយជារឿងធម្មតាទៅហើយសម្រាប់ប្រជាជននៅទីក្រុង ដែលមានប្រជាជនប្រហែលបីលាននាក់ បន្ទាប់ពីប្រទេសរុស្ស៊ី បានចាប់ផ្តើមវាយលុកប្រព័ន្ធថាមពលរបស់ប្រទេសនេះ កាលពីចុងខែមីនា ដោយកាត់បន្ថយពាក់កណ្តាលនៃសមត្ថភាពផលិតរបស់វា។

នៅក្នុងទិដ្ឋភាពដែលនឹកឃើញដល់រដូវរងាឆ្នាំ ២០២៣ ផ្លូវជាច្រើន ត្រូវបានធ្លាក់ចូលទៅក្នុងភាពងងឹត សំឡេងនៃម៉ាស៊ីនភ្លើងឯកជន អាចត្រូវបានគេឮម្តងទៀត នៅតាមផ្លូវនានានៃទីក្រុងគីវ ហើយមនុស្សកាន់ភ្លើងពិល ដើម្បីធ្វើដំណើរ។

លោក Valeriy Tkalich អាយុ ៣៤ឆ្នាំ បាននិយាយទៅកាន់សារព័ត៌មានរ៉យទ័រនៅឯផ្ទះរបស់ខ្លួន នៅទីក្រុងគីវ ដែលជាកន្លែងដែលម៉ាស៊ីនបូមទឹកមិនអាចទៅដល់ជាន់ខ្ពស់ដោយគ្មានអគ្គិសនីនោះ ថា៖«បញ្ហាប្រឈមចម្បង គឺកង្វះទឹកប្រើប្រាស់»។