ការស៊ើបអង្កេតរបស់អង្គការសហប្រជាជាតិ (UN) នៅថ្ងៃពុធ (ទី១២ ខែមិថុនា) បានរកឃើញថា ទាំងអ៊ីស្រាអែល និងក្រុមហាម៉ាស សុទ្ធតែបានប្រព្រឹត្តឧក្រិដ្ឋកម្មសង្រ្គាមដូចគ្នា នៅដំណាក់កាលដំបូងនៃសង្រ្គាម នៅតំបន់ហ្កាហ្សា ដោយលើកឡើងថា សកម្មភាពរបស់អ៊ីស្រាអែល ក៏បានបង្កើតជាឧក្រិដ្ឋកម្មប្រឆាំងមនុស្សជាតិផងដែរ ដោយសារតែការបាត់បង់អាយុជីវិតជនស៊ីវិលយ៉ាងធំសម្បើម។

ការរកឃើញនេះ គឺយកចេញពីរបាយការណ៍ស្របគ្នាចំនួន២ ដែលមួយផ្តោតលើការវាយប្រហាររបស់ពួកហាម៉ាស កាលពីថ្ងៃទី៧ ខែតុលា និងមួយទៀតស្តីពីការឆ្លើយតបខាងយោធារបស់អ៊ីស្រាអែល ដែលត្រូវបានបោះពុម្ពផ្សាយដោយគណៈកម្មការស៊ើបអង្កេត (COI) របស់ UN ដែលទទួលបានសិទ្ធិយ៉ាងទូលំទូលាយខុសពីធម្មតា ដើម្បីធ្វើកិច្ចការប្រមូលភស្តុតាង និងកំណត់អត្តសញ្ញាណជនល្មើស ដែលបានប្រព្រឹត្តឧក្រិដ្ឋកម្មអន្តរជាតិ នៅអ៊ីស្រាអែល និងក្នុងដែនដីកាន់កាប់ប៉ាឡេស្ទីន។

យ៉ាងណាក្ដី អ៊ីស្រាអែលមិនសហការជាមួយគណៈកម្មការនេះទេ ដោយនិយាយថា មានការលម្អៀងប្រឆាំងនឹងអ៊ីស្រាអែល។ COI និយាយថា អ៊ីស្រាអែលរារាំងការងាររបស់ខ្លួន និងរារាំងអ្នកស៊ើបអង្កេតមិនឲ្យចូលទៅកាន់ប្រទេសអ៊ីស្រាអែល និងដែនដីកាន់កាប់ប៉ាឡេស្ទីន។

បេសកកម្មការទូតរបស់អ៊ីស្រាអែលប្រចាំនៅ UN នាទីក្រុងហ្សឺណែវ ប្រទេសស្វីស បានច្រានចោលការរកឃើញនេះ។ ចំណែកក្រុមហាម៉ាសមិនបានឆ្លើយតបភ្លាមៗ ចំពោះសំណើសុំការអត្ថាធិប្បាយនោះទេ។

របាយការណ៍ដែលគ្របដណ្តប់លើជម្លោះរហូតដល់ចុងខែធ្នូ បានរកឃើញថា ភាគីទាំង២ សុទ្ធតែបានប្រព្រឹត្តឧក្រិដ្ឋកម្មសង្គ្រាម ដែលរួមមានការធ្វើទារុណកម្ម ឃាតកម្ម ឬការសម្លាប់ដោយចេតនា ការជះកំហឹងលើសេចក្តីថ្លៃថ្នូរផ្ទាល់ខ្លួន និងការប្រព្រឹត្តដោយអមនុស្សធម៌ ឬដោយឃោរឃៅ៕