ប្រធានាធិបតីបារាំង លោក Emmanuel Macron នៅថ្ងៃពុធ (ទី១២ ខែមិថុនា) នេះ បាននិយាយថា ការរំលាយសភាបារាំង និងការប្រកាសពីការបោះឆ្នោតមុនអាណត្តិ គឺជាការឆ្លើយតបដែលអាចធ្វើទៅបានតែមួយគត់ ចំពោះការបង្ហាញពីភាពរឹងមាំរបស់ក្រុមស្តាំជ្រុលនិយម នៅក្នុងការបោះឆ្នោតអឺរ៉ុប កាលពីចុងសប្តាហ៍កន្លងមក។

លោក Macron បានប្រាប់សន្និសីទសារព័ត៌មានមួយថា៖ «តាមការយល់ឃើញរបស់ខ្ញុំ ការវិលទៅកាន់អធិបតេយ្យេះប្រជាជនវិញ គឺជាការសម្រេចចិត្តរបស់ក្រុមសាធារណរដ្ឋតែមួយគត់ នៅក្នុងបរិបទនេះ»។ លោក Macron បានអំពាវនាវឲ្យមានការបោះឆ្នោតសភាមួយ កាលពីថ្ងៃអាទិត្យ (ទី៩ ខែមិថុនា) បន្ទាប់ពីក្រុមស្តាំនិយមរបស់បារាំង បានយកឈ្នះគណបក្សផ្ទាល់ខ្លួនរបស់លោក នៅក្នុងការបោះឆ្នោតសភាសហភាពអឺរ៉ុប។

ជាមួយគ្នានេះ នៅក្នុងការបោះឆ្នោតសភាមុនអាណត្តិនាពេលខាងមុខ លោក Macron បានអំពាវនាវឲ្យភាគីប្រឆាំងផ្នែកនយោបាយទាំង២ ចូលរួមជាមួយលោក ដើម្បីបង្កើតសម្ព័ន្ធភាពប្រជាធិបតេយ្យប្រឆាំងនឹងគគណបក្សស្តាំជ្រុលនិយម គឺគណបក្សរួបរួមជាតិ (RN) របស់លោកស្រី Marine Le Pen។

នៅក្នុងសុន្ទរកថាយុទ្ធនាការមួយ ពោលគឺមានរយៈពេលប៉ុន្មានថ្ងៃបន្ទាប់ពីមាននូវការអំពាវនាវដ៏គួរឲ្យភ្ញាក់ផ្អើលរបស់លោក ដើម្បីឲ្យមានការបោះឆ្នោត លោក Macron បានទទួលស្គាល់កំហុសឆ្គង ដោយនិយាយថា ជនជាតិបារាំងបានសម្តែងការខឹងសម្បារបស់ពួកគេ ប៉ុន្តែមានអារម្មណ៍ថា ពាក្យសម្ដីរបស់ពួកគេមិនត្រូវបានគេស្តាប់ឮ។ លោក Macron បាននិយាយថា ការបោះឆ្នោតនេះ នឹងផ្តល់ភាពច្បាស់លាស់ជាមិនខាន៕