ឥណ្ឌូនេស៊ី៖ ប្រទេសឥណ្ឌូនេស៊ីនិយាយថា ប្រទេសនេះបានរកឃើញថា វ៉ាក់សាំងការពារវីរុសកូរ៉ូណាប្រភេទ Sinovac មានប្រសិទ្ធភាពតិចក្នុងការការពារ ការស្លាប់ និងជំងឺធ្ងន់ធ្ងរចាប់តាំងពីខែមេសាដល់ខែមិថុនាបើប្រៀបធៀបទៅនឹង ៣ខែមុន។
លោកស្រី Siti Nadia Tarmizi អ្នកនាំពាក្យក្រុមការងារពិសេសប្រឆាំងវីរុស Covid-19 របស់រដ្ឋាភិបាលនិយាយថា ការចាក់វ៉ាក់សាំងបង្ការវីរុសបានការពារការស្លាប់ ៧៩% និងការចូលសម្រាកនៅមន្ទីរពេទ្យបាន ៥៣% ក្នុងអំឡុងពេល ៣ខែបើប្រៀបធៀបទៅនឹង ៣ខែមុនដល់ ៩៥% និង ៧៤% ចាប់ពីខែមករាដល់ខែមីនា។ លោកស្រីមិនបានផ្តល់ហេតុផល ចំពោះការធ្លាក់ចុះនៃប្រសិទ្ធភាពវ៉ាក់សាំងនោះទេ។ ប្រទេសដែលមានប្រជាជនច្រើនបំផុតទី៤ នៅលើពិភពលោកមួយនេះកំពុងប្រយុទ្ធប្រឆាំងនឹងការផ្ទុះឡើងវីរុស ដែលបណ្ដាលមកពីវីរុសបំប្លែងខ្លួនថ្មី Delta ដែលចម្លងខ្ពស់ បាននាំឱ្យប្រទេសនេះឈានដល់ចំនួនអ្នកស្លាប់ខ្ពស់ប្រចាំថ្ងៃ ដោយសារវីរុស Covid-19 នៅលើពិភពលោក។
ចាប់តាំងពីជំងឺឆ្លងបានចាប់ផ្ដើម ប្រទេសឥណ្ឌូនេស៊ីបានកត់ត្រាការឆ្លងវីរុសចំនួនជាង ៣.៨លាននាក់ និង ១១៥.០៩៦នាក់បានស្លាប់។ ប្រទេសដែលមានប្រជាជន ២៦០លាននាក់មួយនេះបានពឹងផ្អែកយ៉ាងខ្លាំង លើវ៉ាក់សាំងផលិតដោយប្រទេសចិនដែលស្មើនឹងមួយភាគបី នៃការផ្គត់ផ្គង់វ៉ាក់សាំងសរុបដែលរំពឹងទុករហូតដល់ខែធ្នូ។ ទីក្រុងហ្សាកាតាបានបើកឡើងវិញ ផ្សារទំនើបលក់រាយរបស់ខ្លួននៅសប្ដាហ៍ នេះ ប៉ុន្តែសម្រាប់តែក្រុមអ្នកដែលបានចាក់វ៉ាក់សាំងបង្ការរួចប៉ុណ្ណោះ ខណៈផ្សារទំនើបត្រូវបានអនុញ្ញាតឱ្យបើកដំណើរការ ដោយមានសមត្ថភាពត្រឹមតែ ២៥% ដើម្បីព្យាយាមធ្វើឱ្យសេដ្ឋកិច្ចបន្តដំណើរការ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
