រដ្ឋាភិបាលនៃប្រទេសអែលសាល់វ៉ាឌ័រ កាលពីថ្ងៃអង្គារ (១១ មិថុនា) បាននិយាយថា ខ្លួនបានផ្ទេរសមាជិកក្រុមអន្ធពាលរាប់ពាន់នាក់ទៅកាន់ «ពន្ធនាគារធំ» ដែលទើបនឹងបើកថ្មីៗនេះ ដោយនេះគឺជាវិធានការចុងក្រោយបង្អស់នៃការបង្រ្កាបដ៏ចម្រូងចម្រាសលើឧក្រិដ្ឋកម្ម ដែលបានបណ្តាលឲ្យចំនួនប្រជាជនជាប់ពន្ធនាគាររបស់ប្រទេសអាមេរិកកណ្តាលមួយនេះ កើនឡើង។

រដ្ឋាភិបាលបានឲ្យដឹងនៅក្នុងសេចក្តីថ្លែងការណ៍មួយថា អ្នកទោសទាំងអស់នោះ «នឹងទទួលបានផលពីការប្រព្រឹត្តិឧក្រិដ្ឋកម្មលើប្រជាជនអែលសាល់វ៉ាឌ័រ ដោយរស់នៅក្នុងរយៈពេលដ៏យូរក្នុងពន្ធនាគារ CECOT នៅដាច់ដោយឡែកពីអ្នកមនុស្សក្នុងសង្គម និងមិនអាចទទួលបានការអនុញ្ញាតឲ្យក្រុមគ្រួសារសួរសុខទុក្ខឡើយ»។

សមាជិកក្រុមអន្ធពាលប្រមាណជា ២.០០០នាក់ ត្រូវបានផ្លាស់ប្តូរទៅកាន់ពន្ធនាគារ ដែលមានសមត្ថភាពដាក់មនុស្ស ៤០.០០០នាក់ ដែលត្រូវបានចាត់ទុកថា ជាពន្ធនាគារធំបំផុត នៅទ្វីបអាមេរិក។ ក្នុងវីដេអូដែលបង្ហោះដោយរដ្ឋាភិបាល អ្នកទោសគ្មានអាវស្លៀកខោខ្លីពណ៌ស និងកោរសក់ ត្រូវបានគេឃើញរត់កាត់ពន្ធនាគារថ្មីនេះចូលទៅក្នុងបន្ទប់។

ប្រធានាធិបតីអែលសាល់វ៉ាឌ័រ លោក Nayib Bukele បានស្នើឲ្យសម្ព័ន្ធមិត្តរបស់លោក នៅក្នុងសភាអែលសាល់វ៉ាឌ័រ យល់ព្រមអនុម័តស្ថានភាពលើកលែង ក្នុងឆ្នាំ២០២២ ដែលចាប់តាំងពីពេលនោះមកត្រូវបានពន្យារជាច្រើនដង ពោលគឺជាការផ្អាកសិទ្ធិតាមរដ្ឋធម្មនុញ្ញមួយចំនួន បន្ទាប់ពីមានការកើនឡើងយ៉ាងខ្លាំងក្លានូវអំពើឃាតកម្ម ដែលជាការរួមចំណែកដោយអំពើហិង្សារបស់ក្រុមអន្ធពាល៕