ក្រុមយុទ្ធជនចលនាតស៊ូរបស់មីយ៉ាន់ម៉ា បានកត់សម្គាល់នូវរបកគំហើញដ៏មុតស្រួចរបស់ខ្លួនកាលពីឆ្នាំមុន ដោយពឹងផ្អែកលើយានដ្រូនសម្រាប់ប្រយុទ្ធជាមួយរបបសឹក ដែលគួរឱ្យខ្លាចបំផុតមួយនៅអាស៊ីអាគ្នេយ៍។

ប៉ុន្តែខណៈដែលសង្រ្គាមស៊ីវិលកាន់តែតានតឹង ក្រុមឧទ្ទាម បានមើលឃើញយានដ្រូនពាណិជ្ជកម្មផលិតដោយប្រទេសចិន ដែលត្រូវបានកែប្រែដើម្បីការប្រយុទ្ធដូចទៅនឹងអាវុធខ្លួនប្រើ កំពុងត្រូវបានប្រើប្រាស់ដោយកងទ័ពរបបយោធាដែលកំពុងកាន់អំណាចរបស់ប្រទេស នេះបើយោងតាមមនុស្សប្រាំពីរនាក់ដែលដឹងពីបញ្ហានេះ។

យុទ្ធជនក្រុមឧទ្ទាមម្នាក់នៅភាគអាគ្នេយ៍របស់ប្រទេសបាននិយាយថា «នៅពេលនេះសមរភូមិកំពុងផ្លាស់ប្តូរ ដោយសារយានដ្រូនត្រូវបានប្រើប្រាស់ដោយភាគីទាំងពីរក្នុងការប្រយុទ្ធ»។ លោកបន្ថែមថា របបសឹកបានចាប់ផ្តើមប្រើប្រាស់យានដ្រូនប្រដាប់អាវុធ (UAVs) ដើម្បីវាយប្រហារពួកឧទ្ទាមនៅដើមឆ្នាំនេះ ហើយអង្គភាពរបស់លោកថ្មីៗនេះ បានបាញ់ទម្លាក់យានដ្រូនមួយគ្រឿង ដែលពួកគេកំណត់ថាបង្កើតឡើងពីឧបករណ៍របស់ចិន ហើយត្រូវបានកែប្រែសម្រាប់ការប្រយុទ្ធ។ យុទ្ធជនក្រុមឧទ្ទាមពីរនាក់នៅផ្នែកផ្សេងទៀតនៃមីយ៉ាន់ម៉ា ក៏បានពណ៌នាអំពីការជួបប្រទះស្រដៀងគ្នានេះប្រាប់ដល់ទីភ្នាក់ងារព័ត៌មានរ៉យទ័រដែរ។

លោក មីន សអូ (Min Zaw Oo) នាយកប្រតិបត្តិនៃវិទ្យាស្ថានមីយ៉ាន់ម៉ាសម្រាប់សន្តិភាព និងសន្តិសុខបាននិយាយថា របបសឹកបានចាប់ផ្តើមទិញយានដ្រូនពាណិជ្ជកម្មចិនរាប់ពាន់គ្រឿងនៅដើមឆ្នាំ ដែលខ្លួនកំពុងកែសម្រួលដើម្បីបំពាក់អាវុធផលិតក្នុងស្រុក។

អ្នកនាំពាក្យយោធាមីយ៉ាន់ម៉ា មិនបានឆ្លើយតបនឹងការហៅទូរស័ព្ទសុំការអត្ថាធិប្បាយទេ ហើយរបបសឹកក៏មិនដែលបាននិយាយជាសាធារណៈអំពីការប្រើប្រាស់យានដ្រូនប្រភេទនេះ នាពេលថ្មីៗនេះដែរ៕