សហគមន៍ជាច្រើននៅទូទាំងរដ្ឋ Florida ភាគខាងត្បូង រួមទាំងតំបន់ Miami និង Fort Lauderdale បានជន់លិចកាលពីថ្ងៃពុធ សប្ដាហ៍នេះ ខណៈមានភ្លៀងធ្លាក់ខ្លាំង ដែលជំរុញឱ្យអភិបាលរដ្ឋប្រកាសអាសន្ន និងអ្នកបើកបរជាច្រើន ជាប់នៅក្នុងទឹកជំនន់ទូទាំងតំបន់។

ការព្រមានពីទឹកជំនន់បានចូលជាធរមានកាលពីរាត្រីថ្ងៃពុធសម្រាប់ផ្នែកខ្លះនៃស្រុក Broward, Miami-Dade, Collier និងស្រុក Hendry រហូតដល់ព្រឹកថ្ងៃព្រហស្បតិ៍នេះ នេះបើយោងតាមសេវាអាកាសធាតុជាតិ ដែលបានព្រមានថា ទឹកជំនន់ដែលគំរាមកំហែងដល់អាយុជីវិត នឹងបន្តរហូតដល់ប៉ុន្មានថ្ងៃខាងមុខទៀត។

សេវាអាកាសធាតុបាននិយាយកាលពីរាត្រីថ្ងៃពុធថា តំបន់ជាច្រើនត្រូវជន់លិចដោយជំនន់ទឹកភ្លៀង ដោយមានរថយន្តជាច្រើនគ្រឿងជាប់ក្នុងទឹកជំនន់ ហើយភ្លៀងកាន់តែច្រើនថែមទៀត កំពុងបន្តនៅឡើយ ដូច្នេះប្រជាពលរដ្ឋគួរតែនៅឲ្យឆ្ងាយពីតាមដងផ្លូវនានាតាមដែលអាចធ្វើទៅបាន។

នៅទីក្រុង Miami របស់រដ្ឋនេះ គេបានមើលឃើញមានរថយន្តជាច្រើនជាប់ក្នុងទឹក ដែលស្ទើរតែលិចដំបូងរថយន្តបាត់។ នេះជាថ្ងៃទីពីរជាប់គ្នាដែលតំបន់ Miami បានប្រឈមគ្រោះទឹកជំនន់។ ព្យុះបាននាំទឹកភ្លៀងពី ២ទៅ ៥ អ៊ីញ និងជន់លិចផ្លូវនានាកាលពីថ្ងៃអង្គារ៕