អភិបាលរាជធានីភ្នំពេញបានប្រជុំ និងប្រកាសចាត់វិធានការម៉ឺងម៉ាត់បំផុត​ចំពោះការ​យក​ភាស៊ី​លើស​សៀវ​ភៅបន្ទុកនៅតាមបណ្ដាផ្សារនានានៅភ្នំពេញ ដែលអ្នកយកថវិ​កា​លើស​សៀវ​ភៅបន្ទុក​អាចប្រ​ឈម​នឹងការបញ្ជូនទៅកាន់តុលាការដើម្បីអនុវត្តទោស។

ឯកឧត្តម ឃួង ស្រេង អភិបាលរាជធានីភ្នំពេញ បានណែនាំឲ្យអាជ្ញាធរតាមបណ្ដាខណ្ឌ ពិសេស​ប្រធា​នគណៈកម្មការផ្សារទាំងអស់នៅក្នុងរាជធានីភ្នំពេញ ត្រូវអនុវត្ត​វិធានការ​ឲ្យ​បាន​ម៉ឺង​ម៉ាត់​បំផុត​ចំពោះ​ការយកភាស៊ីលើសសៀវភៅបន្ទុក ហើយអ្នកដែលយក​ថវិកា​លើស​សៀវភៅ​បន្ទុក​អាច​ប្រឈម​ចំពោះ​មុខច្បាប់ គឺអាចបញ្ជូនទៅកាន់តុលាការដើម្បីអនុវត្តទោស។ ការណែនាំ​របស់​អភិបាលរា​ជធានីភ្នំពេញបានធ្វើឡើងនាព្រឹកថ្ងៃទី១៣ ខែមិថុនា ឆ្នាំ២០២៤ ក្នុងកិច្ចប្រជុំ​បន្ទាន់​មួយ ជាមួយនឹងអាជ្ញាធរខណ្ឌ និងគណៈកម្មការផ្សារទាំងអស់នៅក្នុងរាជធានីភ្នំពេញ។

សង្កត់ធ្ងន់ក្នុងកិច្ចប្រជុំនោះ ឯកឧត្តម ឃួង ស្រេង បានណែនាំឲ្យអាជ្ញាធរខណ្ឌ​ត្រូវ​ហៅអ្នក​យក​ភាស៊ី​ទៅ​ធ្វើកំណត់ហេតុ បើនៅតែល្មើសពីការណែនាំពីរដង គឺត្រូវលុបកិច្ចសន្យាចោល។ នៅ​តាម​ផ្សារ​ត្រូវ​តែរៀបចំឲ្យមានបរិស្ថានល្អ ពោលគឺក្រោយការលក់ដូរត្រូវតែសម្អាតឲ្យបានស្អាត។ បន្ថែម​ពី​នេះ​​​នៅតាមផ្សារមិនត្រូវឲ្យមានល្បែងស៊ីសងជាដាច់ខាត។

ឯកឧត្តម ឃួង ស្រេង បានបញ្ជាក់យ៉ាងម៉ឹងម៉ាត់ថា ការយកថវិកាភាស៊ីលើសសៀវភៅបន្ទុក វា​ស្មើ​នឹងការ​ចាប់ជំរិត ហើយក្រុមហ៊ុនយកភាស៊ីនោះនឹងប្រឈមមុខច្បាប់ និងមិន​អាច​ឲ្យ​ចូលរួ​មដេ​ញ​ថ្លៃ​លើក​ក្រោយទៀ​តឡើ​យ។ ឯកឧត្តមបន្ថែមថា សម្រាប់អាណត្តិទី៧នេះ ត្រូវតែអនុវត្តការងារ​នេះ​ឲ្យ​បាន​តាំង​រឹងបំផុត ដោយអ្នកល្មើសនឹងមានទោសទណ្ឌ។

ក្នុងកិច្ចប្រជុំនេះផងដែរ រដ្ឋបាលរាជធានីភ្នំពេញបានសម្រេចដោយឲ្យអាជ្ញាធរក៏ដូចជា​ប្រធាន​គណៈកម្មការផ្សារ​ទាំ​ងអស់ត្រូវអនុវត្តឲ្យបានម៉ឺងម៉ាត់បំផុត ចំពោះការយកភាស៊ីនៅ​តា​មផ្សា​រ​នា​នា​នៅក្នុ​ង​រាជធានីភ្នំពេញ ពិសេសនៅទីតាំងផ្ញើកង់ម៉ូតូតែម្តង។ នៅទីតាំងផ្ញើ កង់ ម៉ូតូ ដាច់ខាត​ត្រូវ​តែដាក់តារាងតម្លៃឲ្យបានច្បាស់លាស់ ដោយសរសេរអក្សរនៅទីតាំងផ្ញើកង់ម៉ូតូនោះ ថាគ្មាន​ការ​យក​កម្រៃ​លើស​សៀវភៅបន្ទុក ក្នុងករណីមានការបង្ខំឲ្យយកលើសតម្លៃសៀវភៅបន្ទុក ប្រជា​ពលរដ្ឋ​អាច​ទូរស័ព្ទទៅកាន់អាជ្ញាធរខណ្ឌដែលបានដាក់លេខទូរស័ព្ទនៅទីតាំងនោះស្រាប់។ អ្នកវិនិយោគលើភាស៊ីទាំងអស់ត្រូវប្រជុំជាមួយភ្នាក់ងាររបស់ខ្លួន ដើម្បីឲ្យភ្នាក់ងារ​អនុវត្ត​ទៅ​តាម​សៀវភៅ​បន្ទុក។ ភ្នាក់ងារយកភាស៊ីទាំងអស់ត្រូវមានស្លាកឈ្មោះ ឯកសណ្ឋានត្រឹមត្រូវ។ ក្នុង​ករណី យកលើសតម្លៃសៀវភៅបន្ទុក អាជ្ញាធរនឹងលុបកិច្ចសន្យានោះចោលតែម្តង ហើយ​បើ​ពិនិត្យ​ឃើញ​ថា បុគ្គលជាអ្នកយកភាស៊ីនោះបានល្មើសនិងការយកភាស៊ីលើសសៀវភៅបន្ទុក និង​ឃាត់​ខ្លួន​បញ្ជូនទៅកាន់តុលាការ ដែលការងារនេះត្រូវប្រគល់ទៅគណៈកម្មការផ្សារ អាជ្ញាធរខណ្ឌ និង​មន្ទីរ​សេដ្ឋកិច្ចនិងហិរញ្ញវត្ថុ ដើម្បីត្រួតពិនិត្យជាប្រចាំ និងប្រជុំរាល់ខែ៕ អត្ថបទ ៖ ប្រាក់ វ៉ាន់ដា