ភ្នំពេញ ៖បច្ចុប្បន្ននេះ មានរោងចក្រ សហគ្រាស ប្រមាណ១០០ បានស្នើមកក្រសួងបរិស្ថានឱ្យទៅបំពាក់ឧបករណ៍តាមដានស្វ័យប្រវត្តិ និងប្រព័ន្ធគ្រប់គ្រងទិន្នន័យទឹកកខ្វក់មុនបង្ហូរចេញពីរោងចក្រ សហគ្រាស។ នេះបើតាមប្រសាសន៍ឯកឧត្តមបណ្ឌិត អ៊ាង សុផ្លែត រដ្ឋមន្រ្តីក្រសួងបរិស្ថាន បានប្រាប់អ្នកសារព័ត៌មានក្នុងពិធីចុះអនុស្សរណៈនៃការយោគយោល់គ្នាស្តីពី «ប្រព័ន្ធស្រោចស្រពប្រើប្រាស់ថាមពលពន្លឺព្រះអាទិត្យសម្រាប់ថ្នាលបណ្តុះកូនឈើថ្នាក់តំបន់ដំបូងគេនៅកម្ពុជា» ស្ថិតនៅទីស្តីការក្រសួងបរិស្ថាន នាថ្ងៃទី១៣ខែមិថុនានេះ។

ឯកឧត្តមបានបន្តថា ការបំពាក់ឧបករណ៍តាមត្រួតពិនិត្យទឹកកខ្វក់មានសារៈសំខាន់ សម្រាប់ពិនិត្យមើលកំហាប់សារធាតុពុលនៅក្នុងទឹក មុននឹងបង្ហូរចេញពីរោងចក្រ សគ្រាស។ ម្យ៉ាងវិញទៀត ពេលក្រុមហ៊ុនទាំងអស់នោះ បានបំពាក់ឧបករណ៍ គឺងាយស្រួលប្រាប់អ្នកបញ្ជាទិញនៅបរទេស ថាក្រុមហ៊ុនពួកគេ ពិតជាបានគិតគូរពីវិធានបរិស្ថាន ព្រោះមានលិខិតបញ្ជក់ពីក្រសួងបរិស្ថាន។ ឯកឧត្តមបានឱ្យដឹងទៀតថា នៅថ្ងៃចុងសប្តាហ៍នេះ មន្រ្តីក្រសួងបរិស្ថាន នឹងចាប់ផ្តើមចុះបំពាក់ឧបករណ៍តាមត្រួតពិនិត្យទឹកកខ្វក់នៅក្រុមហ៊ុនឱសថមួយកន្លែងនៅខេត្តបាត់ដំបង និងក្រុមហ៊ុនផ្សេងៗទៀត ធ្វើឡើងជាបន្តបន្ទាប់។

​នៅថ្ងៃទី១ខែមីនាកន្លងទៅ ក្រសួងបរិស្ថាន បានដាក់ចេញយុទ្ធនាការសម្អាតទន្លេ និងយុទ្ធនាការបំពាក់ឧបករណ៍តាមដានស្វ័យប្រវត្តិ និងប្រព័ន្ធគ្រប់គ្រងទិន្នន័យ នៅតាមរោងចក្រ សហគ្រាស ក្នុងគោលបំណងទប់ស្កាត់សំណល់ប្លាស្ទិក និងមិនឱ្យមានការបង្ហូរទឹកមានសារៈធាតុពុលចូលទៅក្នុងទន្លេ ដើម្បីការពារធនធានធម្មជាតិក្នុងទន្លេឱ្យនៅឋិតថេរគង់វង្ស។

គួរបញ្ជាក់ដែរថា ព្រះរាជាណាចក្រកម្ពុជា គឺជាប្រទេសមួយក្នុងចំណោមបណ្តាប្រទេសដែលទឹកសន្ធឹកសន្ធាប់នៅក្នុងតំបន់។ បណ្តា អូរ ស្ទឹង បឹង ទន្លេ ទឹកក្រោមដី និងមហាសាគរនៃប្រទេសម្ពុជា គឺជាប្រភពធនធានធម្មជាតិសម្រាប់ការអភិវឌ្ឍសេដ្ឋកិច្ចជាតិលើវិស័យជាច្រើនដូចជា កសិកម្ម សហគ្រាស ឧហ្សាហកម្ម វារីអគ្គិសនី ទេសចរណ៍ និងសម្រាប់ប្រជាពលរដ្ឋយកទឹកទៅប្រើប្រាស់ក្នុងជីវភាពរស់នៅប្រចាំថ្ងៃជាដើម ៕ អត្ថបទ ៖ ទូច សោភ័ណ