ប្រជាជននៅតំបន់ហ្កាហ្សាស្ទ្រីបដែលរងការបំផ្លិចបំផ្លាញដោយសង្រ្គាម បានសម្តែងការព្រួយបារម្ភរបស់ពួកគេ ចំពោះការមិនអនុលោមតាមច្បាប់របស់អ៊ីស្រាអែល ចំពោះសេចក្ដីសម្រេចចុងក្រោយរបស់អង្គការសហប្រជាជាតិ (UN) ដែលអំពាវនាវឲ្យមានបទឈប់បាញ់ នៅក្នុងដែនដីនេះ ដោយលើកឡើងពីការរំលោភបំពានកន្លងមករបស់អ៊ីស្រាអែល ចំពោះសេចក្ដីសម្រេចដែលពាក់ព័ន្ធ។

គួរបញ្ជាក់ថា ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទ (ទី១០ ខែមិថុនា) បានអនុម័តសេចក្ដីសម្រេច ដែលមានគោលបំណងឲ្យបានឈានដល់កិច្ចព្រមព្រៀងបទឈប់បាញ់ដ៏ទូលំទូលាយមួយជា ៣ដំណាក់កាល ដើម្បីបញ្ចប់សង្គ្រាម នៅតំបន់ហ្កាហ្សា។ ដោយទទួលបានការអនុម័តជាមួយនឹងសំឡេងគាំទ្រភាគច្រើន ១៤សំឡេង ហើយរុស្ស៊ីបោះឆ្នោតអនុបវាទ សេចក្ដីសម្រេច 2735 ក៏ជំរុញឲ្យភាគីជម្លោះទាំង២ អនុវត្តទាំងស្រុងនូវសំណើនេះ «ដោយគ្មានការពន្យាពេល និងដោយគ្មានលក្ខខណ្ឌ»។

មន្ត្រីជាន់ខ្ពស់ក្រុមហាម៉ាស លោក Sami Abu Zuhri កាលពីថ្ងៃអង្គារ (ទី១១ ខែមិថុនា) បាននិយាយថា ក្រុមហាម៉ាសបានទទួលយកសេចក្ដីសម្រេចនេះ ហើយបានត្រៀមរួចជាស្រេច ដើម្បីចរចាជុំវិញសេចក្ដិលម្អិតផ្សេងទៀត ខណៈដែលសង្កត់ធ្ងន់លើការទទួលខុសត្រូវរបស់អ៊ីស្រាអែល ក្នុងការអនុវត្តសេចក្ដីសម្រេចនេះ។

ប្រជាជននៅតំបន់ហ្កាហ្សា ក៏បានសម្តែងការគាំទ្ររបស់ពួកគេ ចំពោះសេចក្ដីសម្រេចបទឈប់បាញ់នេះ ប៉ុន្តែព្រួយបារម្ភថា អ៊ីស្រាអែលនឹងមិនអើពើចំពោះសេចក្ដីសម្រេចនេះទេ ដោយលើកឡើងពីការបំពានច្បាប់អន្តរជាតិ និងសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ នាពេលកន្លងមក។

ជនភៀសខ្លួនម្នាក់នៅតំបន់ហ្កាហ្សា ឈ្មោះ Youssef Al-Akkad បាននិយាយថា៖ «យើងគាំទ្រសេចក្ដីសម្រេចនេះ ដែលរួមបញ្ចូលដំណើរការបទឈប់បាញ់។ ប៉ុន្តែវាត្រូវតែជាបទឈប់បាញ់ទាំងស្រុង ដើម្បីកុំឲ្យអ៊ីស្រាអែលធ្វើសង្រ្គាមលើយើងម្តងទៀត ហើយបន្តការសម្លាប់ប្រជាជនប៉ាឡេស្ទីនដែលនៅសល់ បន្ទាប់ពីការដោះដូរចំណាប់ថ្នូរហើយ»៕