យោធាអាមេរិក បានបង្ហើបឲ្យដឹងថា ក្រុមឧទ្ទាមហ៊ួទី បានប្រើប្រាស់នាវាគ្មានមនុស្សបើក ដើម្បីវាយប្រហារលើនាវាពាណិជ្ជកម្ម នៅសមុទ្រក្រហម កាលពីថ្ងៃពុធ។ 

ក្រុមឧទ្ទាមគាំទ្រដោយអ៊ីរ៉ង់ បានប្រើប្រាស់USV ដែលត្រូវបានគេស្គាល់ថា ជាយានដ្រូនរបស់កងទ័ពជើងទឹក ឬនាវាគ្មានមនុស្សបើក ដែលជាផ្នែកនៃការវាយប្រហាររបស់ពួកគេលើផ្លូវដឹកជញ្ជូន នៅសមុទ្រក្រហម និងឈូងសមុទ្រ Aden ប៉ុន្តែពួកគេពិតជាមិនអាចបង្ហាញវាយប្រហារជាក់លាក់ណាមួយទេ រហូតមកដល់ពេលនេះ។

ទីបញ្ជាការកណ្តាលរបស់សហរដ្ឋអាមេរិក (CENTCOM) បាននិយាយថា នាវាផ្ទុកគ្រឿងផ្ទុះទំនងជា បានវាយប្រហារទៅលើនាវា M/V Tutor របស់ក្រុមហ៊ុនដឹកជញ្ជូនភាគច្រើនគ្រប់គ្រងដោយក្រិកដែលមានទង់ជាតិលីបេរីយ៉ា ដោយបញ្ជាក់នៅក្នុងសេចក្តីថ្លែងការណ៍របស់ខ្លួនអំពីឧបទ្ទវហេតុថា «ផលប៉ះពាល់ពីការវាយប្រហាររបស់ USV បានបណ្តាលឲ្យមានទឹកចូល និងខូចខាតយ៉ាងធ្ងន់ធ្ងរដល់បន្ទប់ម៉ាស៊ីននាវានោះ។

នៅមុនពេលចេញផ្សាយសេចក្តីថ្លែងការណ៍របស់ CENTCOM កិច្ចប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេស ដែលជាធាតុផ្សំនៃកងនាវាចរអង់គ្លេស បានបង្ហោះព្រឹត្តិបត្រឧបទ្ទវហេតុមួយ កាលពីថ្ងៃពុធ ដោយនិយាយថា«នាវាតូចមួយគ្រឿង» បានវាយប្រហារនាវាមួយគ្រឿង នៅឯឆ្នេរសមុទ្រនៃប្រទេសយេម៉ែន ក្នុងសមុទ្រក្រហម។ កិច្ចប្រតិបត្តិការនោះ បានពិពណ៌នាអំពីនាវានោះថា ពណ៌ស និងមានប្រវែងចន្លោះពី ៥-៧ម៉ែត្រ (១៦-២៣ហ្វីត)។