នគរបាលនៅក្នុងទីក្រុង ចានឌីហ្កា(Chandigarh) ភាគខាងជើងប្រទេសឥណ្ឌា បាននិយាយ កាលពីថ្ងៃពុធថា ការទទួលការគំរាមកំហែងគ្រាប់បែក នៅវិទ្យាស្ថានសុខភាពផ្លូវចិត្តនៃមហាវិទ្យាល័យវេជ្ជសាស្ត្ររបស់រដ្ឋាភិបាលនិងមន្ទីរពេទ្យ គឺជាសារបោកបញ្ឆោត ហើយគ្មានអ្វីគួរឱ្យសង្ស័យ ត្រូវបានរកឃើញនៅក្នុង និងនៅខាងក្រៅទីតាំង នោះទេ។

រដ្ឋបាលរបស់វិទ្យាស្ថាន បានជូនដំណឹងដល់នគរបាលថា ពួកគេបានទទួលសារអេឡិចត្រូនិក អំពីការគំរាមបំផ្ទុះគ្រាប់បែក នៅក្នុងបរិវេណមន្ទីរពេទ្យ។

អ្នកជំងឺនៅអគារនេះ ត្រូវបានជម្លៀសចេញភ្លាមៗ ហើយមនុស្សទាំងអស់ ត្រូវបានជម្លៀសទៅកន្លែងមានសុវត្ថិភាព។

មន្ត្រីជាន់ខ្ពស់នគរបាល បាននិយាយទៅកាន់ប្រព័ន្ធផ្សព្វផ្សាយថា បុគ្គលិកនគរបាល ក្រុមដោះគ្រាប់បែក និងមន្ត្រីនាយកដ្ឋានពន្លត់អគ្គិភ័យ បានប្រញាប់ប្រញាល់ទៅកាន់មន្ទីរពេទ្យ ដើម្បីរុករក ប៉ុន្តែគ្មានអ្វីត្រូវបានរកឃើញនោះទេ។

មន្ត្រីនគរបាល និយាយបន្ថែមថា បន្ទាប់ពីទទួលបានការអនុញ្ញាតពីមន្ត្រីជាន់ខ្ពស់ មន្ទីរពេទ្យបានបើកឡើងវិញ។

នេះគឺជាឧបទ្ទវហេតុចុងក្រោយ ក្នុងចំណោមសារគំរាមបំផ្ទុះគ្រាប់បែកបោកបញ្ឆោតជាបន្តបន្ទាប់ ដែលត្រូវបានផ្ញើរទៅកាន់សាលារៀន អាកាសយានដ្ឋាន និងមន្ទីរពេទ្យនានា នៅក្នុងប្រទេសឥណ្ឌា។