ភ្នំពេញ ៖ កម្ពុជា-គុយបា ចែករំលែកពីស្ថានភាព និងបញ្ហាប្រឈម ពាក់ព័ន្ធនឹងអំពើហិង្សាក្នុងគ្រួសារ អំពើហិង្សាផ្អែកលើយេនឌ័រ សុខភាព ការសម្របខ្លួនទៅនឹងការប្រែប្រួលអាកាសធាតុ និងភាពជាអ្នកដឹកនាំនៅក្នុងវិស័យសារធារណៈ និងនយោបាយ។ 

​លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី នៅក្នុងជំនួបសម្ដែងការគួរសម និងពិភាក្សាការងារ ជាមួយ លោកជំទាវ មីលលីណា ការីដាដ ហ្សាល់ឌីវ៉ា ភែដត្រា (Milena Caridad Zaldivar Piedra) ឯកអគ្គរដ្ឋទូត នៃសាធារណរដ្ឋគុយបា នៅថ្ងៃទី ១២ ខែ មិថុនា ឆ្នាំ ២០២៤ លោកជំទាវ បានវាយតម្លៃខ្ពស់ពីចំណងមិត្តភាពយូរអង្វែង នៃកិច្ចសហប្រតិបត្តិការរបស់ រដ្ឋាភិបាលនៃប្រទេសទាំងពីរ ក្នុងការលើកកម្ពស់ស្ថានភាពប្រជាជន ដែលផ្តោតសំខាន់ទៅលើការអភិវឌ្ឍធនធានមនុស្ស សុខភាព និងកិច្ចការបរទេសជាដើម។ 

នៅក្នុងជំនួបពិភាក្សានេះ លោកជំទាវកិត្តិបណ្ឌិតរដ្ឋមន្រ្តី លោកជំទាវឯកអគ្គរដ្ឋទូត បានធ្វើការចែករំលែកពីស្ថានភាព និង បញ្ហាប្រឈមរវាងគ្នាទាំងវិញទៅមក ជាពិសេសពាក់ព័ន្ធនឹងអំពើហិង្សាក្នុងគ្រួសារ អំពើហិង្សាផ្អែកលើយេនឌ័រ សុខភាព ការសម្រប ខ្លួនទៅនឹងការប្រែប្រួលអាកាសធាតុ និងភាពជាអ្នកដឹកនាំនៅក្នុងវិស័យសារធារណៈ និងនយោបាយជាដើម។

លោកជំទាវកិត្តិបណ្ឌិតរដ្ឋមន្រ្តី ក៏បានលើកឡើងអំពីផែនការសកម្មភាពជាតិ ស្តីពីការទប់ស្កាត់អំពើហិង្សាលើស្រ្តី និងផែនការ យុទ្ធសាស្រ្តនារីរតនៈទី ៦ ដែលជាផែនទីចង្អុលផ្លូវ ដើម្បីលើកកម្ពស់សមភាពយេនឌ័រ និងបង្កើនភាពអង់អាចផ្នែកសេដ្ឋកិច្ចដល់ ស្រ្តីនៅកម្ពុជា។ 

ឆ្លៀតក្នុងឱកាសនោះ លោកជំទាវកិត្តិបណ្ឌិត អ៊ឹង កន្ថាផាវី ក៏បានលើកឡើង ការដឹកនាំប្រតិភូនៃក្រសួងកិច្ចការនារី បំពេញ បេសកកម្មផ្លូវការនៅប្រទេសគុយបា ក្នុងគោលបំណងសិក្សាស្វែងយល់អំពីឧត្តមានុវត្តន៍ នៃការលើកកម្ពស់ស្ថានភាពស្ត្រី ក្នុងភាពជា អ្នកដឹកនាំ សុខភាព និងសេដ្ឋកិច្ច ជាពិសេសជាចំណែកមួយក្នុងការជម្រុញការរឹតចំណងទំនាក់ទំនងរវាងប្រជាជន និងប្រជាជន នៃប្រទេសទាំងពីរ៕

អត្ថបទ៖ សុន រ៉ាឌី