កំពង់ឆ្នាំង៖ នៅថ្ងៃទី១៣ ខែមិថុនា ឆ្នាំ២០២៤នេះ យុវជន ឆន ប៊ុនឡេង ជាសិស្សបញ្ចប់ជំនាញបច្ចេកទេសនៅវិទ្យាស្ថានបណ្តុះបណ្តាលជំនាញវិជា្ជជីវៈ បានថ្លែងអំណរគុណដល់សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលសម្តេចបានខិតខំក្នុងការផ្តល់អាហារូបករណ៍១០០%ក្នុងកម្មវិធីបណ្តុះបណ្តាលជំនាញវិជា្ជជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ក្នុងកម្រិតសញ្ញាបត្របច្ចេកទេស និងវិជ្ជាជីវៈ១ សិក្សារយៈពេល៤ខែដោយឥតគិតថ្លៃ ក្នុងវិទ្យាស្ថានពហុបច្ចេកទេសខេត្តកំពង់ឆ្នាំងកន្លងមក ។ ក្រោយបញ្ចប់វគ្គសិសក្សានេះ ប្អូន និងយុវជនប្រមាណជាង៧០%មានការងារធ្វើត្រឹមត្រូវ និងមានប្រាក់ខែសមរម្យទៀតផង។

យុវជន ឆន ប៊ុនឡេង បានបន្តថា៖ ដោយសារការយកចិត្តទុកដាក់លើកកម្ពស់លើវិស័យការងារ រាជរដ្ឋាភិបាលអាណត្តិទី៧ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានអោយវិទ្យាស្ថានពហុបច្ចេកទេសខេត្តកំពង់ឆ្នាំង ប្រកាសជ្រើសរើសយុវជនយុវនារីមកពីគ្រួសារដែលមានបណ្ណក្រីក្រ១ និងក្រ២ និងគ្រួសារដែលមានបណ្ណសម្គាល់ជនងាយរងហានិភ័យទាំងអស់ ឲ្យចូលសិក្សាដោយឥតបង់ថ្លៃសិក្សាលើមុខជំនាញ ដូចជាជំនាញការដំឡើងបណ្តាញអគ្គិសនីក្នុងអគារ , ការថែទាំ និងជួសជុលរថយន្ត , ការកែច្នៃបន្លែ និងផ្លែឈើ , សេវាកម្មកុំព្យូទ័រ , ជំនាញសេវាកម្មបរិក្ខារត្រជាក់ក្នុងគេហដ្ឋាន ។ ក្រោយពីប្អូនបានបញ្ចប់មុខជំនាញហើយនោះ ប្អូនបានទទួលការងារមួយល្អ និងពេញចិត្ត មានប្រាក់ខែសមរម្យ គឺក្នុង១ខែ១៧០ដុល្លា ។ ប្អូនសប្បាយចិត្ត និងបានអរគុណដល់សម្តេចធិបតី ហ៊ុន ម៉ាណែត នាយករដ្ឋមន្ត្រីដែលបានផ្តល់ចំណេះដឹងតាមរយៈវិទ្យាស្ថានបណ្តុះបណ្តាលជំនាញវិជា្ជជីវៈនេះដល់ប្អូន និងយុវជនក្រីក្រដទៃទៀត អោយមានជំនាញក្នុងការប្រកបមុខរបរចិញ្ចឹមជីវិត និងគ្រួសារ និងអាចជួយដល់សង្គមជាតិផងដែរ។

លោក លី ច័ន្ទរិទ្ធ នាយកវិទ្យាស្ថានបណ្តុះបណ្តាលជំនាញវិជា្ជជីវៈខេត្តកំពង់ឆ្នាំង បានអំពាវនាវដល់យុវជនរស់នៅក្នុងគ្រួសារដែលមានបណ្ណសមធម៌ក្រីក្រ១និង២ និងបណ្ណសម្គាល់គ្រួសារជនងាយរងហានិភ័យ និងមានអាយុចាប់ពី១៥ឆ្នាំ ដល់៣៥ឆ្នាំ សូមមកទទួលយកជំនាញបច្ចេកទេសពីវិទ្យាស្ថានក្នុងដំណាក់កាលទី២នេះ ចាប់ពីពេលផ្សាយដំណឹងនេះទៅ ដើម្បីទទួលបានជំនាញមួយសម្រាប់ការចិញ្ចឹមជីវិត និងអភិវឌ្ឍគ្រួសាររបស់ខ្លួនអោយមានជីវភាពធូរធារមួយកម្រឹតទៀត ។ ដោយឡែកសិស្សដែលបានបញ្ចប់ការសិក្សាជំនាញបច្ចេកទេសលើកទី១ បានទទួលការងារធ្វើ និងមានប្រាក់ខែសមរម្យប្រមាណជាង៧០% និង៣០%ទៀតបានបើកមុខរបរខ្លួនឯង និងកំពុងរកការងារធ្វើ។  

គួរបញ្ជាក់ថា៖ គិតមកដល់ថ្ងៃទី១៣ ខែមិថុនា ឆ្នាំ២០២៤នេះ មានយុវជន យុវនារីមកពីគ្រួសារក្រីក្រ និងងាយរងហានិភ័យប្រមាណជាង១០០នាក់ហើយ ដែលបានមកចុះឈ្មោះសុំចូលរៀនវគ្គទី២នៅទីនេះ។ ដោយឡែកអាសយដ្ឋានវិទ្យាស្ថានពហុបច្ចេកវិទ្យាខេត្តកំពង់ឆ្នាំងវិញ គឺនៅក្នុងភូមិទួលក្រឡាញ់ សង្កាត់កំពង់ឆ្នាំង ក្រងកំពង់ឆ្នាំង ៕ ដោយ ៖ កាំង ហុងវាស្នា