ភ្នំពេញ ៖ ឯកឧត្តមវេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល តំណាងដ៏ខ្ពង់ខ្ពស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបលោកវេជ្ជបណ្ឌិត Yoshioka ស្ថាបនិកអង្គការបេះដូងជប៉ុន, នៅរសៀលថ្ងៃទី១២ ខែមិថុនា ឆ្នាំ២០២៤ នៅទីស្តីការក្រសួងសុខាភិបាល។

​ឯកឧត្តមវេជ្ជបណ្ឌិតរដ្ឋលេខាធិការ បានស្វាគមន៍ និងថ្លែងអំណរគុណដល់អង្គការបេះដូងជប៉ុន ដែលជាអង្គការអន្តរជាតិមិនមែនរដ្ឋាភិបាល ដែលបានចូលរួមធ្វើកិច្ចការស្ម័គ្រចិត្តផ្តល់សេវាព្យាបាលជំងឺទូទៅ និងវះកាត់ដល់មនុស្សពេញវ័យ និងកុមារ ហើយផ្តោតសំខាន់លើការព្យាបាលជំងឺមហារីកកុមារ និងដែលបានចូលមកប្រទេសកម្ពុជាចាប់តាំងពីឆ្នាំ២០០៩ មកម៉្លេះ។ 

លោកវេជ្ជបណ្ឌិត Yoshioka ស្ថាបនិកអង្គការបេះដូងជប៉ុន បានជម្រាបជូនអង្គប្រជុំថា អង្គការបេះដូងជប៉ុនបានចាប់ផ្តើមបំពេញបេសកកម្មផ្តល់សេវាសុខាភិបាលដំបូង គឺការធ្វើគ្លីនិកចល័តនៅតាមតំបន់ជនបទក្នុងខេត្តព្រៃវែង ខេត្តកំពង់ចាម និងខេត្តកណ្តាល ដោយក្រុមគ្រូពេទ្យស្ម័គ្រចិត្តជនជាតិជប៉ុន។ ចំពោះការព្យាបាលដោយវះកាត់ អង្គការបានសហការជាមួយមន្ទីរពេទ្យបង្អែកខេត្ត ដែលជាដៃគូ ដើម្បីចូលរួមចំណែកផ្តល់ការវះកាត់ និងបណ្តុះបណ្តាលបច្ចេកទេសសុខាភិបាលដល់ក្រុមគ្រូពេទ្យនៅតាមមូលដ្ឋាន។ ជាលទ្ធផល អង្គការបានសម្រេចលទ្ធផល ផ្តល់ការព្យាបាលដល់អ្នកជំងឺក្រៅប្រមាណ២០,០០០នាក់ និងអ្នកជំងឺវះកាត់ ៣,០០០ករណី ជារៀងរាល់ឆ្នាំតាមរយៈសកម្មភាពសុខាភិបាល។ ចំនួនវេជ្ជបណ្ឌិត គិលានុបដ្ឋាយិកា ឆ្មប និងបុគ្គលិកសុខាភិបាលផ្សេងទៀតបានកើនឡើង និងមានសមត្ថភាព ពិនិត្យ ព្យាបាល និងវះកាត់ជូនអ្នកជំងឺប្រកបដោយបច្ចេកទេស និងគុណភាពកម្រិតខ្ពស់នៅមន្ទីរពេទ្យ។

ក្នុងនាមឯកឧត្តមសាស្ត្រាចារ្យរដ្ឋមន្ត្រីក្រសួងសុខាភិបាល ឯកឧត្តមវេជ្ជបណ្ឌិតរដ្ឋលេខាធិការ បានថ្លែងអំណរគុណដល់ អង្គការបេះដូងជប៉ុន ជាពិសេសលោកវេជ្ជបណ្ឌិត Yoshioka ស្ថាបនិកអង្គការបេះដូងជប៉ុន និងបានផ្តល់ជាអនុសាសន៍គន្លឹះដល់គណៈកម្មាធិការនាយករបស់មន្ទីរពេទ្យក្នុងការដឹកនាំមន្ទីរពេទ្យ ដើមី្បធ្វើយ៉ាងណាឱ្យការដឹកនាំមន្ទីរពេទ្យមាននិរន្តរភាព និងកាន់តែមានការរីកចម្រើនបន្ថែមទៀត។

ឯកឧត្តមវេជ្ជបណ្ឌិតរដ្ឋលេខាធិការ ក៏បានបញ្ជាក់ពីគោលជំហរគាំទ្រដំណើរការមន្ទីរពេទ្យអង្គការបេះដូងជប៉ុន និងបានស្នើភាគីម្ចាស់ជំនួយបន្តគាំទ្រមន្ទីរពេទ្យ ដើមី្បរួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាល ក៏ដូចជារាជរដ្ឋាភិបាលកម្ពុជា ក្នុងការលើកកម្ពស់គុណភាពសេវាសុខាភិបាល និងយកចិត្តទុកដាក់ខ្ពស់ពីសុខុមាលភាពកុមារកម្ពុជា ឱ្យឈានទៅសម្រេចបាននូវការគ្របដណ្តប់សុខភាពជាសកល ស្របតាមផែនការយុទ្ធសាស្រ្តបញ្ចកោណ នៃរាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

អត្ថបទ៖ រដ្ឋា