ភ្នំពេញ ៖ អង្គភាពប្រឆាំងអំពើពុករលួយ (ACU)និងគណៈត្រួតពិនិត្យកិច្ចការរដ្ឋចិន ខេត្តយូណាន បានប្ដេជ្ញារួមគ្នាបង្កើនកិច្ចសហប្រតិបត្តិការប្រឆាំងអំពើពុករលួយនៃប្រទេសទាំងពីរ។ការប្ដេជ្ញានេះធ្វើឡើង ក្នុងពេលគណៈប្រតិភូនៃគណៈកម្មាធិការត្រួតពិនិត្យរដ្ឋចិន ខេត្តយូណាន បានអញ្ជើញទស្សនកិច្ចនៅអង្គភាពប្រឆាំងអំពើពុករលួយ។

ឯកឧត្តម កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី ប្រធានអង្គភាពប្រឆាំងអំពើពុករលួយ នៅរសៀលថ្ងៃទី១៣ ខែមិថុនា ឆ្នាំ២០២៤នេះ បានទទួលស្វាគមន៍ ដំណើរទស្សនកិច្ចផ្លូវការរបស់គណៈប្រតិភូបក្សកុម្មុយនិស្តចិន និងរដ្ឋ ខេត្តយូណាន ដឹកនាំដោយឯកឧត្តម Feng Zhili សមាជិកអចិន្រ្តៃយ៍ នៃគណបក្សកុម្មុយនិស្តចិន ខេត្តយូណាន លេខាគណៈអធិការវិន័យ នៃគណៈកម្មាធិការបក្សកុម្មុយនិស្តចិន ខេត្តយូណាន និងជាប្រធានគណៈត្រួតពិនិត្យកិច្ចការរដ្ឋចិន ខេត្តយូណាន។

ក្នុងជំនួបការងារនេះ ឯកឧត្តម កិត្តិនីតិកោសលបណ្ឌិត ឱម យ៉ិនទៀង មានប្រសាសន៍ថា អង្គភាព ប្រឆាំងអំពើពុករលួយឈរលើគោលការណ៍ធំៗចំនួន៣ ដើម្បីប្រឆាំងអំពើពុករលួយ ដែលក្នុងនោះរួមមាន៖ទី១.ការអប់រំ ដោយអប់រំឱ្យស្អប់អំពើពុករលួយ អប់រំឱ្យស្រឡាញ់សុចរិតភាព និងស្រឡាញ់ភាពស្អាតស្អំ។ ទី២.ការបង្ការ និងទប់ស្កាត់ និងទី៣.បង្ក្រាប និងកសាងសំណុំរឿងទៅតុលាការ។

ឯកឧត្តមបន្តថា ការប្រយុទ្ធប្រឆាំងអំពើពុករលួយកម្ពុជា គឺជាការងារអាទិភាពមួយរបស់រាជរដ្ឋាភិបាលអាណត្តិមុនៗ ហើយបន្តមករាជរដ្ឋាភិបាលអាណត្តិទី៧នេះ ដោយបានចាត់ទុកការកែទម្រង់ និងពង្រឹងអភិបាលកិច្ចជាស្នូលនៃយុទ្ធសាស្រ្តបញ្ចកោណដំណាក់កាលទីមួយ។

ជាមួយគ្នានេះ ឯកឧត្តម Feng Zhili បានថ្លែងអំណរគុណចំពោះការទទួលស្វាគមន៍ដ៏កក់ក្តៅពីឯកឧត្តម កិត្តិនីតិកោសលបណ្ឌិត ឱម យ៉ិនទៀង ប្រធានអង្គភាពប្រឆាំងអំពើពុករលួយ និងងសម្តែងនូវសេចក្តីរីករាយដែលបានអញ្ជើញមកបំពេញទស្សនកិច្ចផ្លូវការនៅកម្ពុជានាពេលនេះ។លើសពីនេះ ឯកឧត្តមក៏បានលើកឡើង អំពីចំណងសាមគ្គីភាព មិត្តភាព កិច្ចសហប្រតិបត្តិការរវាង សាធារណរដ្ឋប្រជាមានិតចិន និងព្រះរាជាណាចក្រកម្ពុជា ដែលមានការរីកចម្រើនជាលំដាប់ ហើយមកទប់ពេលនេះបានឈានដល់ការកសាងសហគមន៍ជោគវាសនារួម និងកិច្ចសហប្រតិបត្តិការ «ត្បូងពេជ្រ»។

បន្ទាប់មកភាគីទាំងពីរ បានសន្យាលើកកម្ពស់កិច្ចសហប្រតិបត្តិការឲ្យកាន់តែល្អប្រសើរថែមទៀតក្នុងការប្រយុទ្ធប្រឆាំងអំពើពុករលួយរវាងប្រទេសទាំងពីរ ព្រមទាំងសម្តែងនូវសេចក្តីរីករាយ ក្នុងការចូលរួមក្នុងពិធីចុះហត្ថលេខាលើអនុស្សារណៈនៃការយោគយល់គ្នារវាងអង្គភាពប្រឆាំងអំពើពុករលួយ និងក្រុមហ៊ុនវិនិយោគអាកាសយានដ្ឋានអន្តរជាតិសៀមរាបអង្គរ នៅថ្ងៃទី ១៤ ខែមិថុនា ឆ្នាំ២០២៤ ៕ អត្ថបទ៖ ទូច សោភ័ណ ​