រដ្ឋមន្ត្រីការបរទេសសហភាពអឺរ៉ុប (EU) ចំនួន៨ បានអំពាវនាវឲ្យ EU ហាមឃាត់អ្នកការទូតរុស្ស៊ីមិនឲ្យធ្វើដំណើរដោយសេរី នៅជុំវិញប្លុកនេះ និងកម្រិតពួកគេ ចំពោះត្រឹមតែប្រទេសដែលពួកគេត្រូវបានទទួលស្គាល់ប៉ុណ្ណោះ ដោយការស្នើនេះមាននៅក្នុងលិខិតមួយផ្ញើទៅកាន់ប្រធានគោលនយោបាយការបរទេសរបស់ EU លោក Josep Borrell។

យោងតាមលិខិតចុះថ្ងៃទី១១ ខែមិថុនា ដែលសារព័ត៌មាន Reuters បានឃើញ បានរៀបរាប់ថា៖ «ការធ្វើដំណើរដោយសេរីរបស់អ្នកកាន់លិខិតឆ្លងដែនការទូត និងសេវាកម្មរបស់រុស្ស៊ី ដែលត្រូវបានទទួលស្គាល់នៅក្នុងរដ្ឋម្ចាស់ផ្ទះ នៅទូទាំងតំបន់ Schengen ទាំងមូល កំពុងបន្ធូរបន្ថយសកម្មភាពអាក្រក់នានា»។

រដ្ឋមន្ត្រីទាំងនោះបានប្រាប់ថា ការស៊ើបការណ៍សម្ងាត់ ការឃោសនា «ឬសូម្បីតែការរៀបចំសកម្មភាពវិឆ្ឆេទកម្មនានា គឺជាបន្ទុកការងារចម្បង សម្រាប់ «អ្នកការទូត» របស់រុស្ស៊ីមួយចំនួនធំ នៅ EU» ហើយខណៈពេលដែលការបណ្តេញចេញ មានសារៈសំខាន់ ការគំរាមកំហែងនៅតែមានដដែល។

ពួកគេបាននិយាយថា៖ «យើងជឿថា EU គួរតែអនុវត្តតាមយ៉ាងតឹងរ៉ឹងនូវគោលការណ៍មានផលប្រយោជន៍ទៅវិញទៅមក និងកម្រិតការធ្វើដំណើររបស់សមាជិកនៃបេសកកម្មការទូតរុស្ស៊ី និងសមាជិកគ្រួសាររបស់ពួកគេ ចំពោះដែនដីនៃរដ្ឋដែលពួកគេទទួលស្គាល់តែប៉ុណ្ណោះ»។

លិខិតនោះបានបន្ថែមថា «វិធានការនេះនឹងបង្រួមទំហំប្រតិបត្តិការ សម្រាប់ភ្នាក់ងាររុស្ស៊ី»។ លិខិតនេះត្រូវបានចុះហត្ថលេខាដោយរដ្ឋមន្ត្រីមកពីសាធារណរដ្ឋឆែក ដាណឺម៉ាក អេស្តូនី ឡាតវី លីទុយអានី ហូឡង់ ប៉ូឡូញ និងរ៉ូម៉ានី៕