រដ្ឋមន្ត្រីការបរទេសចាំផ្ទះរបស់អ៊ីរ៉ង់ លោក Ali Bagheri Kani និងរដ្ឋមន្ត្រីការបរទេសវ៉េណេហ្ស៊ុយអេឡា លោក Yvan Gil Pinto បានលើកឡើងពីភាពចាំបាច់ ក្នុងការពង្រីកទំនាក់ទំនង និងកិច្ចសហប្រតិបត្តិការទ្វេភាគីបន្ថែមទៀត ជាពិសេស ដើម្បីប្រឆាំងនឹងទណ្ឌកម្មរបស់សហរដ្ឋអាមេរិក។

ភាគីទាំងពីរ បានជួបគ្នានៅខាងក្រៅកិច្ចប្រជុំរដ្ឋមន្ត្រីការបរទេស BRICS នៅទីក្រុង Nizhny Novgorod ប្រទេសរុស្ស៊ី ហើយបានសង្កត់ធ្ងន់លើតម្រូវការគាំទ្រប៉ាឡេស្ទីន និងថ្កោលទោសអ៊ីស្រាអែលចំពោះការវាយប្រហាររបស់ខ្លួនលើតំបន់ហ្កាហ្សាស្ទ្រីប។ នេះបើយោងតាមសេចក្តីថ្លែងការណ៍ចេញផ្សាយដោយក្រសួងការបរទេសអ៊ីរ៉ង់ កាលពីថ្ងៃពុធ។

លោក Bagheri Kani បានចង្អុលទៅគម្រោង «ចម្រុះ និងដ៏ច្រើន»សម្រាប់កិច្ចសហប្រតិបត្តិការទ្វេភាគី ដោយអំពាវនាវឲ្យមានកិច្ចសហប្រតិបត្តិការ និងទំនាក់ទំនងជាបន្តបន្ទាប់បន្ថែមទៀតរវាងមន្ត្រីអ៊ីរ៉ង់ និង    វ៉េណេហ្ស៊ុយអេឡា នៅក្នុងតំបន់ផ្សេងៗគ្នា ដើម្បីអភិវឌ្ឍន៍ទំនាក់ទំនងទ្វេភាគីបន្ថែមទៀត។

ខណៈពេលដែលងាកទៅរកសង្រ្គាមនៅតំបន់ហ្កាហ្សា លោក Bagheri Kani បានស្នើឡើងថា សហគមន៍អន្តរជាតិ គួរតែខិតខំប្រឹងប្រែងបន្ថែមទៀត ដើម្បីបញ្ឈប់ «សង្រ្គាម និងឧក្រិដ្ឋកម្ម» របស់អ៊ីស្រាអែល និងជួយសម្រួលដល់ការផ្តល់ជំនួយមនុស្សធម៌ដល់ប្រជាជន «ដែលត្រូវបានគេគាបសង្កត់» នៅដែនដីឆ្នេរប៉ាឡេស្ទីននេះ។