អគ្គលេខាធិការអង្គការណាតូលោក ចេន ស្តូលថិនប៊ឺក (Jens Stoltenberg)កាលពីថ្ងៃពុធ បានអំពាវនាវឲ្យសម្ព័ន្ធមិត្តអនុម័តគម្រោងសម្របសម្រួលជំនួយយោធា និងការបណ្តុះបណ្តាលសម្រាប់អ៊ុយក្រែនក្នុងការការពារប្រឆាំងនឹងការឈ្លានពានរបស់រុស្ស៊ី។

ថ្លែងនៅមុនកិច្ចប្រជុំរយៈពេលពីរថ្ងៃនៃរដ្ឋមន្ត្រីការពារជាតិណាតូ នៅទីក្រុងប្រ៊ុចសែល លោក ស្តូលថិនប៊ឺក បានអំពាវនាវឲ្យសម្ព័ន្ធមិត្ត«អនុម័តផែនការសម្រាប់អង្គការណាតូ ដើម្បីដឹកនាំការសម្របសម្រួលជំនួយសន្តិសុខ និងការបណ្តុះបណ្តាលដល់អ៊ុយក្រែន»។

គម្រោងនេះ គឺជាផ្នែកសំខាន់នៃកញ្ចប់ការពារសម្រាប់អ៊ុយក្រែន ដែលសម្ព័ន្ធភាពដែលមានសមាជិក ៣២ប្រទេស ចង់អនុម័តនៅក្នុងកិច្ចប្រជុំកំពូលក្រុមមេដឹកនាំ នៅទីក្រុងវ៉ាស៊ីនតោន ក្នុងខែកក្កដា។

មានកិច្ចពិភាក្សាកំពុងបន្តរវាងសម្ព័ន្ធមិត្ត ដើម្បីបញ្ជាក់ពីការប្តេជ្ញាចិត្តចំពោះការគាំទ្រផ្នែកហិរញ្ញវត្ថុរយៈពេលវែងដល់អ៊ុយក្រែន។ លោក ស្តូលថិនប៊ឺក បាននិយាយកាលពីមុនថា ទឹកប្រាក់ ៤០ពាន់លានអឺរ៉ូ (៤៣ពាន់លានដុល្លារ) គឺត្រូវការជាចាំបាច់ជារៀងរាល់ឆ្នាំសម្រាប់អ៊ុយក្រែនយ៉ាងតិចបំផុត។

អគ្គលេខាធិការអង្គការណាតូ បាននិយាយថា លោករំពឹងថា រដ្ឋមន្ត្រីការពារជាតិនៅក្នុងសម្ព័ន្ធភាព នឹងអនុម័តគម្រោងបណ្តុះបណ្តាល និងគាំទ្រ នៅថ្ងៃសុក្រ។