ពលរដ្ឋនិយាយថា ឧទ្ធម្ភាគចក្រអ៊ីស្រាអែល បានវាយប្រហារទីក្រុង Rafah នៃតំបន់ហ្កាហ្សា កាលពីថ្ងៃព្រហស្បតិ៍ ទី១៣ មិថុនា ដោយក្រុមសកម្មប្រយុទ្ធរាយការណ៍ពីការប្រយុទ្ធគ្នានៅតាមដងផ្លូវក្នុងទីក្រុងភាគខាងត្បូង ខណៈប្រធានាធិបតីសហរដ្ឋអាមេរិក លោក Joe Biden បានហៅក្រុមហាម៉ាស ថាជា ការពន្យាពេលយូរបំផុតចំពោះបទឈប់បាញ់ មួយផ្សេងទៀត។

ភាពតានតឹង បានកើនឡើងនៅតាមព្រំដែនភាគខាងជើងរបស់អ៊ីស្រាអែល ដោយមានការវាយលុកកាន់តែច្រើន ពីសំណាក់សម្ព័ន្ធមិត្តក្រុមហាម៉ាស គឺក្រុមហេសបូឡា នៅលីបង់ ដោយកំពុងដាក់គោលដៅលើទីតាំងយោធា។

កងកម្លាំងទ័ពជើងគោកអ៊ីស្រាអែល បានធ្វើប្រតិបត្តិការនៅទីក្រុង Rafah ចាប់តាំងពីដើមខែឧសភា ទោះបីជាមានការព្រមានយ៉ាងទូលំទូលាយអំពីជោគវាសនារបស់ជនស៊ីវិលប៉ាឡេស្ទីន នៅទីនោះ និងការចេញសេចក្តីសម្រេចរបស់តុលាការយុត្តិធម៌អន្តរជាតិក៏ដោយ។

ពលរដ្ឋ និយាយថា តំបន់ភាគខាងលិចទីក្រុង Rafah បានទទួលរងការបាញ់ផ្លោងបង្កឲ្យមានអគ្គិភ័យយ៉ាងសន្ធោសន្ធៅ កាលពីថ្ងៃព្រហស្បតិ៍។

ក្រុមហាម៉ាសនិយាយថា ក្រុមអ្នកប្រយុទ្ធរបស់ខ្លួន បានប្រយុទ្ធជាមួយកងទ័ពអ៊ីស្រាអែល នៅតាមដងផ្លូវនៃទីក្រុងក្បែរព្រំដែនតំបន់ហ្កាហ្សា ជាមួយប្រទេសអេហ្ស៊ីប ដែលត្រូវបានហ៊ុមព័ទ្ធ។

នៅប្រទេសអ៊ីតាលី ក្នុងកិច្ចប្រជុំកំពូល G7 លោក Biden បានហៅក្រុមហាម៉ាស ថាជា ការពន្យាពេលយូរបំផុត រហូតមកដល់ពេលនេះ ចំពោះកិច្ចព្រមព្រៀងស្តីពីបទឈប់បាញ់នៅតំបន់ហ្កាហ្សា និងការដោះលែងចំណាប់ខ្មាំង។