កាលពីវេលាម៉ោង ៧ និង៣០នាទីយប់ ថ្ងៃទី១៣ ខែមិថុនា ឆ្នាំ២០២៤ មាន​ករណី​គ្រោះ​អគ្គិភ័យ​កើត​ឡើងបណ្ដាលអោយឆេះផ្ទះប្រជាពលរដ្ឋ ចំនួន ០១ផ្ទះ និងសម្ភារៈប្រើប្រាស់ជាច្រើនទៀត ខូចខាតអស់ទាំងស្រុង។

ហេតុការណ៍នេះ បានកើតឡើងនៅចំណុចភូមិព្រែកចំឡាក់ ឃុំកញ្ជរ ស្រុកឆ្លូង ខេត្តក្រចេះ។

តាម​ការបញ្ជាក់ពីប្រភពនៅកន្លែងកើតហេតុ បានឲ្យដឹងថា ម្ចាស់ផ្ទះ ឈ្មោះ ឡាយ សារិន ភេទស្រី អាយុ ៧៣ឆ្នាំ ជនជាតិខ្មែរ រស់នៅជាមួយចៅបង្កើត និងចៅប្រសារ និងទារកអាយុទើប បីខែ។

យោងតាមរបាយការណ៍របស់សមត្ថិច្ច បានឲ្យដឹងថា មូលហេតុ ដែលបណ្ដាល​ឲ្យ​មាន​អគ្គិភ័យ​កើត​ឡើង គឺមកពីការឆ្លងចរន្ដអគ្គិសនី ទើបបណ្តាលឲ្យឆាប់ឆេះផ្ទះប្រជាពលរដ្ឋ ទំហំ ៧ម៉ែត្រ x ១៦ម៉ែត្រ ធ្វើអំពីឈើប្រក់ក្បឿង ស្រូវចំនួន ១០បេ និងសម្ភារៈប្រើប្រាស់មួយចំនួនទៀត សរុប​ជាទឹកប្រាក់អស់ប្រហែល ចំនួន ១០ម៉ឺនដុល្លាសហរដ្ឋអាមេរិក។

សមត្ថកិច្ច បានបញ្ជាក់ថា ក្នុងករណីខាងលើនេះ កម្លាំងអធិការដ្ឋាននគរបាលស្រុកឆ្លូង បានចេញ​រថយន្ដ​ពន្លត់អគ្គិភ័យចំនួន ០១គ្រឿង កម្លាំងស្នងការដ្ឋាននគរបាលខេត្តក្រចេះ ចេញរថយន្ត​ពន្លត់​អគ្គិភយ័ ចំនួន ០២គ្រឿង និងរថយន្តពន្លត់អគ្គីសភ័យក្រុងក្រចេៈ ០១គ្រឿង ប្រើប្រាស់​អស់​ទឹក​ចំនួន ៥រថយន្ត ដើម្បីជួយអន្តរាគមន៍បាញ់ពន្លត់ធ្វើអោយរលត់បានទាំងស្រុង មិនឆេះរាល​ដាល​ប៉ះ​ពាល់ទៅដល់ផ្ទះប្រជាពលរដ្ឋក្បែរខាងផ្សេងទៀត និងពុំបណ្តាល​អោយ​មាន​មនុស្ស​រងរបួស​ឡើយ៕ អត្ថបទ៖ សេង ម័រ