លោកប្រធានាធិបតី ចូ បៃដិន (Joe Biden) កាលពីថ្ងៃព្រហស្បតិ៍ (១៣ មិថុនា) បានធ្វើសុន្ទរកថាជាសាធារណៈលើកដំបូងរបស់ខ្លួនអំពីសាលក្រមមានទោសរបស់កូនប្រុសឈ្មោះ ហាន់ធឺ បៃដិន (Hunter Biden) លើបទចោទប្រកាន់សហព័ន្ធទាក់ទងនឹងការកាន់កាប់កាំភ្លើងដោយខុសច្បាប់ កាលពីដើមសប្តាហ៍នេះ ដោយប្រាប់អ្នកសារព័ត៌មាននៅក្នុងប្រទេសអ៊ីតាលីថា លោកនឹងមិនលើកលែងទោសឱ្យកូនប្រុសរបស់ខ្លួនឡើយ ខណៈក៏មានមោទនភាពចំពោះលោក ហាន់ធឺ ផងដែរ ហើយនិងទទួលយកសាលក្រមរបស់គណៈវិនិច្ឆ័យ។

លោក បៃដិន បាននិយាយនៅក្នុងសន្និសីទសារព័ត៌មានក្រៅកិច្ចប្រជុំកំពូល G7 ថា «ខ្ញុំមានមោទនភាពយ៉ាងខ្លាំងចំពោះ ហាន់ធឺ ដោយសារគេបានយកឈ្នះលើការញៀនគ្រឿងញៀន។ ខ្ញុំនឹងគោរពតាមការសម្រេចរបស់គណៈវិនិច្ឆ័យ ហើយខ្ញុំនឹងមិនលើកលែងទោសឱ្យកូនប្រុសទេ»។

កាលពីថ្ងៃអង្គារ (១១ មិថុនា) គណៈវិនិច្ឆ័យសមាជិក ១២ រូបបានកាត់ទោសកូនប្រុសរបស់លោក បៃដិន គឺលោក ហាន់ធឺ បៃដិន ពីបទកុហកអំពីការប្រើប្រាស់គ្រឿងញៀនរបស់ខ្លួនដើម្បីទិញកាំភ្លើងដោយខុសច្បាប់ក្នុងឆ្នាំ២០១៨ ដោយធ្វើឱ្យលោកក្លាយជាកូនប្រធានាធិបតីអាមេរិកកំពុងកាន់តំណែងដំបូងគេ ដែលត្រូវបានកាត់ទោសពីបទព្រហ្មទណ្ឌ។

លោក បៃដិន បានបញ្ជាក់សារជាថ្មីថា លោកនឹងមិនលើកលែងទោសដល់កូនប្រុសរបស់ខ្លួនឡើយ ដែលជាការបញ្ជាក់ម្ដងទៀតនូវការប្តេជ្ញាចិត្តដែលលោកបានធ្វើកាលពីសប្តាហ៍មុន មុនពេលលោក ហាន់ធឺ ត្រូវបានកាត់ទោស។ ប្រធានាធិបតីរូបនេះក៏បានលើកឡើងកាលពីថ្ងៃព្រហស្បតិ៍ដែរថា លោកនឹងមិនពិចារណាលើការកាត់បន្ថយទោសកូនប្រុសលោកទេ។ សូមបញ្ជាក់ថា ប្រធានាធិបតីអាមេរិកមានអំណាចទាំងការលើកលែងទោស និងកាត់បន្ថយរយៈពេលជាប់ទោស ឬសម្រាលទោសនៅក្នុងសំណុំរឿងសហព័ន្ធ៕