ចំបាប់៖ លោក Komeil Ghasemi គ្រូបង្វឹកក្រុមកីឡាចំបាប់ជម្រើសជាតិកម្ពុជា និងជាអតីតម្ចាស់មេដាយមាសកីឡាអូឡាំពិកឆ្នាំ២០១២ បានប្ដេជ្ញានឹងជំរុញការហ្វឹកហាត់របស់ក្រុមកីឡាចំបាប់ជម្រើសជាតិកម្ពុជា ដោយប្រើប្រាស់ចិត្ដវិទ្យាដើម្បីពង្រឹងឆន្ទៈចង់ឈ្នះរបស់កីឡាករ-កីឡាការិនីម្នាក់ៗរហូតសម្រេចគោលដៅក្លាយជាជើងឯក។
ការលើកឡើងរបស់គ្រូបង្វឹកជនជាតិអ៊ីរ៉ង់រូបនេះ បន្ទាប់ពីលោកទទួលរថយន្ដ ១គ្រឿងពីលោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា និងនាយកវិទ្យាស្ថាន CamEd Business School សម្រាប់បំពេញបេសកកម្មក្នុងការបង្វឹកហាត់កីឡាករ-កីឡាការិនីចំបាប់ជម្រើសជាតិកម្ពុជាកម្ពុជាកាលពីចុងសប្ដាហ៍កន្លងទៅ។ គ្រូបង្វឹកវ័យ ៣៣ឆ្នាំរូបនេះបានបញ្ជាក់ថា ក្រៅពីលើកកម្ពស់ជំនាញ និងការហ្វឹកហាត់ លោកនឹងផ្ដោតការហ្វឹកហាត់បន្ថែមនូវចិត្តវិទ្យាដល់កីឡាករ-កីឡាការិនី ដើម្បីបង្កើនទំនុកចិត្តលើខ្លួនឯងសម្រាប់ការវិនិយោគកម្លាំង និងពេលវេលាក្នុងការបង្កើនជំនាញ និងក្ដីសង្ឃឹមក្នុងការប្រកួត ហើយលោកជឿជាក់ថា កីឡាករ-កីឡាការិនីកម្ពុជានឹងអាចធ្វើបាន។ លោក ខេស៊ី បាណេត បានបង្ហាញនូវសុទិដ្ឋិនិយមខ្ពស់ ចំពោះការនាំយកគ្រូបង្វឹកកម្រិតខ្ពស់ មកដឹកនាំក្រុមកីឡាចំបាប់ជម្រើសជាតិកម្ពុជា ហើយលោករំពឹងថា លោក Komeil Ghasemi នឹងជួយជំរុញការហ្វឹកហាត់ ក៏ដូចជាពង្រឹងសមត្ថភាព និងបច្ចេកទេសកីឡាករ-កីឡាការិនីចំបាប់កម្ពុជាកាន់តែខ្លាំងក្លា ដើម្បីត្រៀមប្រកួតប្រជែងមេដាយស៊ីហ្គេមនៅវៀតណាមផង និងស៊ីហ្គេមឆ្នាំ២០២៣ នៅកម្ពុជាផង។
គួរដឹងថា លោក Komeil Ghasemi ត្រូវបានតែងតាំងជាគ្រូបង្វឹកក្រុមកីឡាចំបាប់ជម្រើសជាតិកម្ពុជា ក្រោមកិច្ចសន្យារយៈពេល ១ឆ្នាំតាមរយៈគម្រោងអភិវឌ្ឍកីឡារបស់គណៈកម្មាធិការជាតិ CAMSOC។ មុនមកដឹកនាំក្រុមចំបាប់កម្ពុជា លោកធ្លាប់ឈ្នះមេដាយធំៗលើឆាកអន្ដរជាតិជាច្រើន ពិសេសលោកធ្លាប់ឈ្នះមេដាយមាសអូឡាំពិកឆ្នាំ២០១២ នៅចក្រភពអង់គ្លេស និងឈ្នះមេដាយប្រាក់អូឡាំពិកឆ្នាំ២០១៦ នៅប្រេស៊ីល៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
