តុលាការកំពូលរបស់សហរដ្ឋអាមេរិក បានច្រានចោលសំណុំរឿងដាក់ដោយក្រុមប្រឆាំងការរំលូតកូន និងវេជ្ជបណ្ឌិតក្នុងការរឹតបន្តឹងលទ្ធភាពនៃប្រើប្រាស់ថ្នាំរំលូតកូន ដោយប្រគល់ជ័យជម្នះកាលពីថ្ងៃព្រហស្បតិ៍ (១៣ មិថុនា) ដល់រដ្ឋបាលរបស់លោកប្រធានាធិបតី ចូ បៃដិន (Joe Biden) ក្នុងកិច្ចខិតខំប្រឹងប្រែងរបស់ខ្លួនដើម្បីរក្សាសិទ្ធិប្រើប្រាស់ថ្នាំយ៉ាងទូលំទូលាយ។

រយៈពេលពីរឆ្នាំបន្ទាប់ពីការបញ្ចប់ការទទួលស្គាល់សិទ្ធិរំលូតកូនតាមរដ្ឋធម្មនុញ្ញ ក្រុមចៅក្រម បានសម្រេចក្នុងសំឡេងគាំទ្រ ៩ ទល់នឹង ០ ដើម្បីបដិសេធការសម្រេចរបស់តុលាការជាន់ទាបក្នុងការបង្វែរជំហានរបស់រដ្ឋបាលចំណីអាហារ និងឱសថរបស់សហរដ្ឋអាមេរិក (FDA) ក្នុងឆ្នាំ២០១៦ និង២០២១ ដែលបានបន្ធូរបន្ថយមធ្យោបាយដែលថ្នាំឈ្មោះថា ឱសថរំលូតកូន មីហ្វហ្វឺព្រីស្តូន (mifepristone) ត្រូវបានចេញវេជ្ជបញ្ជា និងចែកចាយ។ ការសម្រេចនេះត្រូវបានអនុញ្ញាតដោយចៅក្រមអភិរក្សនិយម លោក ប្រ៊េត ខាវ៉ាណាហ្វ (Brett Kavanaugh)។

ថ្នាំគ្រាប់ ដែលត្រូវបានផ្តល់ការយល់ព្រមពីបទប្បញ្ញត្តិរបស់រដ្ឋបាល FDA ក្នុងឆ្នាំ២០០០ ត្រូវបានប្រើនៅក្នុងការរំលូតកូនជាង ៦០ ភាគរយនៅសហរដ្ឋអាមេរិក។ ក្រុមយុត្តិធម៌បានសម្រេចថា ដើមបណ្តឹងដែលបានប្តឹងនៅរដ្ឋតិចសាស់ (Texas) ក្នុងឆ្នាំ២០២២ ខ្វះជំហរផ្លូវច្បាប់ចាំបាច់ដើម្បីបន្តសំណុំរឿងនេះ ដែលតម្រូវឱ្យពួកគេបង្ហាញថាខ្លួនបានទទួលគ្រោះថ្នាក់ពីឱសថនោះ ក្នុងវិធីមួយដែលអាចតាមដានបានដោយរដ្ឋបាល FDA ។

ប្រធានាធិបតីបក្សប្រជាធិបតេយ្យ លោក បៃដិន ដែលកំពុងស្វះស្វែងរកអាណត្តិទីពីរនៅក្នុងការបោះឆ្នោតនៅសហរដ្ឋអាមេរិកថ្ងៃទី០៥ ខែវិច្ឆិកា បានដាក់គោលដៅលើក្រុមមន្ត្រីសាធារណៈរដ្ឋដែលនៅពីក្រោយការហាមឃាត់បែបនេះ ដោយពួកគេនិយាយថាខ្លួនចង់ផ្ដល់ភាពខុសច្បាប់ដល់ការរំលូតកូននៅទូទាំងប្រទេស ហើយថាសេចក្តីសម្រេចកាលពីថ្ងៃព្រហស្បតិ៍ «មិនផ្លាស់ប្តូរការពិតដែលថាការប្រយុទ្ធដើម្បីសេរីភាពបន្តពូជ នៅតែបន្ត»៕