ការស៊ើបអង្កេតរបស់អង្គការសហប្រជាជាតិ បានចោទប្រកាន់ថា យោធាអ៊ីស្រាអែល ទំនងជាបានសម្លាប់ពលរដ្ឋរបស់ខ្លួន ជាង១០នាក់ ក្នុងអំឡុងពេលនៃការវាយប្រហារថ្ងៃទី៧ ខែតុលា។

របាយការណ៍របស់គណៈកម្មាការអង្គការសហប្រជាជាតិ ដែលបានស៊ើបអង្កេតការវាយប្រហារលើអ៊ីស្រាអែល និងសង្រ្គាមជាបន្តបន្ទាប់ នៅតំបន់ហ្កាហ្សា បានចងក្រងឯកសារពី«ការចង្អុលបង្ហាញដ៏រឹងមាំ» ដែលថា «បទបញ្ជា Hannibal» ត្រូវបានគេប្រើប្រាស់ក្នុងករណីជាច្រើន នៅថ្ងៃនោះ ដែលបាន«បង្កមហន្តរាយ ពាល់ដល់ពលរដ្ឋអ៊ីស្រាអែល ក្នុងពេលតែមួយ ជាមួយនឹងការវាយប្រហារទៅលើក្រុមសកម្មប្រយុទ្ធប៉ាឡេស្ទីន»។

បទបញ្ជានេះ ដែលត្រូវបានលុបចោលជាផ្លូវការ ក្នុងឆ្នាំ ២០១៦ ត្រូវបានដាក់ឲ្យនៅជាធរមាន ដើម្បីការពារការចាប់ខ្លួនទាហានអ៊ីស្រាអែលដោយកងកម្លាំងសត្រូវ ដែលអាចប្រើវាជាប្រយោជន៍ ដែលអនុញ្ញាតឲ្យកងទ័ពបើកការបាញ់ប្រហារ ទោះបីជាវាបណ្តាលឲ្យសមមិត្តស្លាប់ ក៏ដោយ។

ក្រុមអ្នកស៊ើបអង្កេតរបស់UN ដែលដឹកនាំដោយលោក Navi Pillay អតីតប្រធានសិទ្ធិមនុស្សUN បានសន្និដ្ឋានថា យ៉ាងហោចណាស់ជនស៊ីវិលអ៊ីស្រាអែល ១៤នាក់ រួមទាំងកូនភ្លោះអាយុ ១២ឆ្នាំ និងជីដូនអាយុ ៦៨ឆ្នាំម្នាក់ ទំនងជាត្រូវបានសម្លាប់ ដោយសារការវាយប្រហារបស់កងកម្លាំងសន្តិសុខ អ៊ីស្រាអែល។

ការចោទប្រកាន់ជាក់លាក់ទាំងនេះ មិនទាន់ត្រូវបានដោះស្រាយដោយអ៊ីស្រាអែលនៅឡើយទេ ប៉ុន្តែរដ្ឋាភិបាល បានបដិសេធយ៉ាងខឹងសម្បាចំពោះរបាយការណ៍ទូទៅ ដែលបានចោទប្រកាន់ទាំងក្រុមប៉ាឡេស្ទីន និងអ៊ីស្រាអែលពីបទប្រព្រឹត្តឧក្រិដ្ឋកម្មសង្គ្រាម។ គណៈកម្មាការអង្គការសហប្រជាជាតិ ក៏បានអះអាងដែរថា ការប្រព្រឹត្តសង្រ្គាមរបស់អ៊ីស្រាអែល រួមមានឧក្រិដ្ឋកម្មប្រឆាំងមនុស្សជាតិ។