ប្រទេសអេស្ប៉ាញ និងទួរគីកាលពីថ្ងៃព្រហស្បតិ៍ បានអំពាវនាវដល់សហគមន៍អន្តរជាតិឲ្យបញ្ឈប់ «ការសម្លឹងមើលផ្លូវផ្សេង» ហើយជំរុញឲ្យបញ្ចប់ការវាយប្រហាររបស់អ៊ីស្រាអែលលើតំបន់ហ្កាហ្សា ដើម្បីកម្ទេច ក្រុមហាម៉ាស បន្ទាប់ពីកិច្ចប្រជុំកំពូលទ្វេភាគីដែលផ្តោតលើការពង្រឹងកិច្ចសហប្រតិបត្តិការសេដ្ឋកិច្ចរវាងបណ្តាប្រទេសមេឌីទែរ៉ាណេ។

អស់រយៈពេលជាយូរមកហើយ សហគមន៍អន្តរជាតិ បានមើលផ្លូវផ្សេង (...) ខ្លួនបានគិតថា បើគ្មានការដោះស្រាយជម្លោះនេះទេ យើងអាចរស់នៅដោយសន្តិភាព និងស្ថិរភាព។ អ្វីដែលបានកើតឡើងក្នុងអំឡុងពេល ៨ខែនេះ បានបើកភ្នែកមើលពិភពលោក»។ នាយករដ្ឋមន្ត្រីអេស្ប៉ាញលោក Pedro Sanchez បាននិយាយនៅក្នុងសន្និសីទសារព័ត៌មាន បន្ទាប់ពីកិច្ចប្រជុំកម្រិតខ្ពស់លើកទី៨ រវាងរដ្ឋាភិបាលក្រុងម៉ាឌ្រីដ និងទីក្រុងអង់ការ៉ា។

ប្រទេសអេស្ប៉ាញ អៀរឡង់ និងន័រវែស បានទទួលស្គាល់រដ្ឋប៉ាឡេស្ទីនជាផ្លូវការ នៅថ្ងៃទី ២៨ ខែឧសភា ក្នុងកិច្ចខិតខំប្រឹងប្រែងសម្របសម្រួលមួយ ខណៈពេលដែលទួរគី បានទទួលស្គាល់រដ្ឋប៉ាឡេស្ទីន ជាលើកដំបូងក្នុងឆ្នាំ ១៩៨៨។ លោក Sánchez បានជំរុញឲ្យប្រទេសអឺរ៉ុប និងលោកខាងលិចផ្សេងទៀត ដើរតាមគន្លងរបស់ពួកគេ «ព្រោះវាជាដំណោះស្រាយតែមួយគត់ ដែលអាចធានាបាន សន្តិភាព និងសន្តិសុខ នៅមជ្ឈិមបូព៌ា»។

កាលពីថ្ងៃចន្ទ ក្រុមប្រឹក្សាសន្តិសុខអង្គការសហប្រជាជាតិ បានអនុម័តដោយសំឡេងគាំទ្រយ៉ាងលើសលប់នូវដំណោះស្រាយដំបូងរបស់ខ្លួនគាំទ្រផែនការបទឈប់បាញ់ដែលបានដាក់ចេញដោយប្រធានាធិបតីអាមេរិក ចូ បៃដិន ក្នុងគោលបំណងបញ្ចប់សង្គ្រាមរយៈពេល ៨ខែរវាងអ៊ីស្រាអែល និងក្រុមហាម៉ាស នៅតំបន់ហ្កាហ្សា។

ទាំងក្រុមហាម៉ាស និងអ៊ីស្រាអែល មិនបានទទួលយកទាំងស្រុងនូវសំណើបទឈប់បាញ់នោះទេ។