យោងតាមសេចក្តីរាយការណ៍ កាលពីថ្ងៃព្រហស្បតិ៍ បានឲ្យដឹងថា ភ្លៀងធ្លាក់ខ្លំាងនៅតំបន់ភាគកណ្តាល និងភាគខាងត្បូងប្រទេសឈីលី បណ្តាលឲ្យមនុស្សម្នាក់ បាត់បង់ជីវិត និងមនុស្ស ៤ពាន់នាក់ គ្មានផ្ទះសម្បែងរស់នៅ ក្នុងនោះផ្ទះសម្បែងរាប់ពាន់ខ្នង រងការខូចខាត ។

តំបន់រងផលប៉ះពាល់ខ្លាំងជាងគេបំផុត រួមមានតំបន់ Maule, Nuble, Biobio និងតំបន់ Araucania ។

ពលរដ្ឋរស់នៅក្នុងទីក្រុង Curanilahue គឺជាទីក្រុងតូចមួយនៅក្នុងតំបន់រងផលប៉ះពាល់ដោយសារជំនន់ទឹកភ្លៀង កំពុងប្រឈមផលវិបាកបង្កឡើងដោយសារភ្លៀងធ្លាក់ខ្លាំង ពេលដែលពួកគបន្តបោសសម្អាតល្បាប់ភក់ចេញពីផ្ទះរបស់ពួកគេ ។

លោក Juan Manuel Gajardo គឺជាពលរដ្ឋក្នុងស្រុកមួយរូប និយាយថា មនុស្សចាស់និយាយថា វាគឺជាលើកដំបូងហើយដែលទឹកទន្លេឡើងខ្ពស់បែបនេះ ។

ខណៈពេលនោះដែរ នៅទីក្រុងតំបន់ឆ្នេរ Vina del Mar ការិយាល័យគ្រោះមហន្តរាយរដ្ឋាភិបាលឈីលី បានជម្លៀសមនុស្សរាប់រយនាក់ចេញពីអគារ ៣ខ្នងនៅជិតមាត់សមុទ្រ ។ ចំណាត់ការនេះ បានធ្វើឡើង ក្រោយភ្លៀងធ្លាក់ខ្លាំងបណ្តាលឲ្យបាក់ដី ៕