មន្ត្រីនគរបាលម្នាក់ បានបាញ់ចៅក្រមម្នាក់ឲ្យរងរបួសនៅតុលាការ ក្នុងរដ្ឋធានីណៃរ៉ូប៊ីរបស់ប្រទេសកេនយ៉ា កាលពីថ្ងៃព្រហស្បតិ៍ (១៣ មិថុនា) មុនពេលនគរបាលរូបនោះត្រូវបានសម្លាប់ នៅក្នុងការបាញ់តគ្នាជាមួយមន្ត្រីនគរបាលដទៃទៀត។ នេះបើយោងតាមតុលាការ។

ប្រធានការិយាល័យមន្ត្រីរដ្ឋបាល បានឲ្យដឹងនៅក្នុងសេចក្តីថ្លែងការណ៍មួយថា លោកស្រី Monica Kivuti ដែលជាចៅក្រមថ្នាក់ក្រោម នៅឯកន្លែងកាត់ក្ដី Makadara ត្រូវបានបាញ់ប្រហារ បន្ទាប់ពីបានបដិសេធសំណើសុំបង់ប្រាក់ធានា សម្រាប់ភរិយារបស់មន្ត្រីនគរបាលរូបនោះ។

ចំណែកសេចក្តីថ្លែងការណ៍របស់ប្រធានមន្ត្រីយុត្តិធម៌ លោកស្រី Martha Koome បាននិយាយថា លោកស្រី Kivuti និងមន្ត្រី ៣នាក់ផ្សេងទៀត បានរងរបួសនៅក្នុងការបាញ់ប្រហារដែលបានកើតឡើងនោះ។

លោកស្រី Koome បាននិយាយថា «វាច្បាស់ណាស់ថា ចេតនារបស់ជនល្មើស គឺចង់សម្លាប់ចៅក្រមរូបនោះ» ដោយបញ្ជាឲ្យពង្រឹងសន្តិសុខនៅតុលាការទាំងអស់ទូទាំងប្រទេស។

របាយការណ៍របស់នគរបាលដែលសារព័ត៌មាន Reuters បានឃើញ បានឲ្យដឹងថា ភរិយារបស់នគរបាលរូបនោះ បានស្នើសុំឲ្យមានការដោះលែងឲ្យនៅក្រៅឃុំ បន្ទាប់ពីបានផ្ដល់ចម្លើយថា មានទោស ពីបទទទួលបានប្រាក់ជិត ២៣.០០០ដុល្លារ ដោយការក្លែងបន្លំ៕