នៅថ្ងៃសុក្រនេះ នាវាល្បាតរបស់កងទ័ពជើងទឹកកាណាដា បានធ្វើដំណើរទៅដល់កំពង់ផែទីក្រុងឡាហាវ៉ាន់ ប្រទេសគុយបា ។

នាវា Margaret Brooke បានចូលចតកំពង់ផែ រយៈពេល ២ថ្ងៃក្រោយនាវាច្បាំងរបស់រុស្ស៊ី បានធ្វើដំណើរទៅដល់ប្រទេសកោះនៅតំបន់ការ៉ាអ៊ីបមួយនេះ ។

គួរឲ្យដឹងថា នាវាចម្បាំងកងទ័ពជើងទឹក និងនាវាមុជទឹកដើរដោយថាមពលនុយក្លេអ៊ែររបស់រុស្ស៊ី បានចូលចតកំពង់ផែទីក្រុងឡាហាវ៉ាន់ កាលពីថ្ងៃពុធ គឺជាការឈប់សំចតមួយដែលសហរដ្ឋអាមេរិក និងគុយបា និយាយថា គ្មានការគំរាមកំហែងនោះទេ ប៉ុន្តែត្រូវបានគេមើលឃើញថារុស្ស៊ី មានចេតនាបង្ហាញកម្លាំងកងទ័ពជើងទឹករបស់ខ្លួន ស្របពេលដែលភាពតានតឹងឡើងកម្តៅខ្លាំង ជុំវិញសង្រ្គាមនៅអ៊ុយក្រែន ។

ក្រសួងការពារជាតិរុស្ស៊ី បាននិយាយថា នាវារុស្ស៊ី ត្រូវបានគេរំពឹងថា នឹងបន្តសំចតនៅក្នុងកំពង់ផែទីក្រុងឡាហាវ៉ាន រហូតដល់ថ្ងៃទី ១៧ ខែមិថុនា ។ 

ខណៈពេលនោះដែរ ប្រជាជនគុយបា បានបង្ហាញការចាប់អារម្មណ៍ចំពោះនាវាចម្បាំងរបស់កងទ័ពជើងទឹករុស្ស៊ី ដែលបានមកចូលចតនៅទីក្រុងឡាហាវ៉ាន បន្ទាប់ពីត្រូវបានអនុញ្ញាតឲ្យនាវាធ្វើទស្សនកិច្ច ។ 

ដើម្បីចូលទៅទស្សនានាវានេះ ប្រជាជនគុយបា បានឈរជាជួរដ៏វែងនៅច្រកចូលចំណត Havana Cruise Terminal ជាកន្លែងដែលតាមធម្មតានាវាចាកចេញ ៕