កំពង់ឆ្នាំង៖ នៅថ្ងៃទី១៤ ខែមិថុនា ឆ្នាំ២០២៤ លោក ឈាង តុលា នាយកសាខាធនាគារជាតិនៃកម្ពុជា ខេត្តកំពង់ឆ្នាំង បានអោយដឹងថា ដោយសារសុខសន្តិភាពក្នុងប្រទេស ទើបធ្វើអោយវិស័យធនាគារវីង បានបោះជំហានទៅមុខដ៏សំខាន់មួយទៀត ជាមួយនឹងការបើកសម្ពោធសាខាថ្មីរបស់ខ្លួនស្ថិតនៅចំកណ្តាលក្រុងកំពង់ឆ្នាំង។ យុទ្ធសាស្ត្រនៃការពង្រីកខ្លួននេះ គឺនាំមកនូវសេវាធនាគារដ៏សម្បូរបែប ក៏ដូចជាដំណោះស្រាយហិរញ្ញវត្ថុដែលមានភាពច្នៃប្រឌិត ដើម្បីផ្តល់អំណាចនិងគាំទ្រទៅដល់សហគមន៍ តាមរយៈការរួមចំណែកជំរុញបរិយាបន្នហិរញ្ញវត្ថុកាន់តែប្រសើរបន្ថែមទៀត។

នៅក្នុងពិធីនេះមានការចូលរួមជាអធិបតីពីឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង, លោក ឈាង តុលា នាយកសាខាធនាគារជាតិនៃកម្ពុជាខេត្តកំពង់ឆ្នាំង, ឯកឧត្តមបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការ នៃអគ្គលេខាធិការដ្ឋានអាជ្ញាធរសេវាហិរញ្ញវត្ថុមិនមែនធនាគារ។អ្នកឧកញ៉ា គិត ម៉េង ប្រធានក្រុមប្រឹក្សាភិបាល ធនាគារ វីង និងជាអគ្គនាយកក្រុមហ៊ុន រ៉ូយ៉ាល់គ្រុប និងលោកជំទាវ ព្រមទាំងឧកញ៉ា គិត ស៊ូឡា ប្រធានផ្នែកប្រតិបត្តិការនៃក្រុមហ៊ុន រ៉ូយ៉ាល់គ្រុប អន្តរជាតិ ព្រមទាំងការអញ្ជើញចូលរួមពីភ្ញៀវកិត្តិយសជាច្រើនទៀតផងដែរ។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានបង្ហាញការកើតសរសើរចំពោះធនាគារ វីង ដែលទទួលបានការគាំទ្រ និងទំនុកចិត្តពីសាធារណជន និងបានពង្រីកខ្លួនជាបន្តបន្ទាប់ ។ ឯកឧត្តមបានសង្ឃឹមយ៉ាងមុតមាំថា ធនាគារ វីង នឹងដើរតួនាទីយ៉ាងសំខាន់ក្នុងការផ្តល់ជាដំណោះស្រាយ ក៏ដូចជាការឆ្លើយតបនឹងតម្រូវការផ្នែកហិរញ្ញវត្ថុដល់ប្រជាជនកម្ពុជា និងអាជីវកម្មក្នុងខេត្តកំពង់ឆ្នាំងទាំងមូលផងដែរ។”

លោក ឈាង តុលា នាយកសាខាធនាគារជាតិនៃកម្ពុជា ខេត្តកំពង់ឆ្នាំង តំណាងលោកជំទាវបណ្ឌិត ជា សិរី អគ្គទេសាភិបាលធនាគារជាតិនៃកម្ពុជា បានវាយតម្លៃខ្ពស់ដល់ការខិតខំប្រឹងប្រែងរបស់ធនាគារ វីង ក្នុងការពង្រីកបណ្តាញប្រតិបត្តិការអាជីវកម្មជាបន្តបន្ទាប់។ សាខាថ្មីរបស់ធនាគារ វីង បានបង្ហាញឱ្យឃើញពីវឌ្ឍនភាព និងភាពរីកចម្រើន ដោយបានបង្កើតផលិតផល និងសេវាហិរញ្ញវត្ថុថ្មីៗ សម្បូរបែបបន្ថែមទៀត និងបានពង្រីកខ្លួនដល់ក្រុងកំពង់ឆ្នាំង ខេត្តកំពង់ឆ្នាំង សំដៅបង្ខិតសេវាហិរញ្ញវត្ថុជូនដល់សាធារណជន។ ធនាគារ វីង នឹងចាប់ផ្តើមរួមចំណែកដ៏សំខាន់ក្នុងការអភិវឌ្ឍខេត្តកំពង់ឆ្នាំង តាមរយៈការដាក់ឱ្យដំណើរការសាខាធនាគារនេះ។

លោកឧកញ៉ា គិត ស៊ូឡា បានលើកឡើងថា៖ ធនាគារ វីង បានបង្ហាញពីការយកចិត្តទុកដាក់របស់ខ្លួនក្នុងការគាំទ្រចក្ខុវិស័យរបស់ក្រុមហ៊ុន រ៉ូយ៉ាល់គ្រុប អន្តរជាតិ ក្នុងការធ្វើពិពិធកម្ម និងលើកកម្ពស់ផលប័ត្រឌីជីថលរបស់ខ្លួន។ ការរួមបញ្ចូលគ្នានៃសេវាកម្មតាមឌីជីថល និងនៅតាមទីតាំងនានារបស់ខ្លួន បានជំរុញឱ្យធនាគារ វីង អាចបង្កើនភាពប្រកួតបប្រជែងរបស់ខ្លួនកាន់តែខ្លាំងជាងមុន ហើយនេះក៏ជាមោទនភាពមួយសម្រាប់រ៉ូយ៉ាល់គ្រុបផងដែរ។ វាជាសក្ខីភាពមួយចំពោះការខិតខំប្រឹងប្រែរបស់ធនាគារ វីង ហើយក៏ជាតម្លៃរួមមួយដែលពួកយើងប្រកាន់ខ្ជាប់ផងដែរ។ ដោយមានទ្រព្យសកម្មជិត២ពាន់លានដុល្លារអាមេរិក ភ្នាក់ងារវីង១១.០០០ទីតាំង ដៃគូអាជីវកម្មប្រមាណ ១៦៥.០០០ ព្រមទាំងមានអតិថិជនប្រើប្រាស់ជាង ១៤,៥លានគណនី ធនាគារ វីង បានក្លាយជាធនាគារឌីជីថលរីកចម្រើនយ៉ាងឆាប់រហ័សមួយនៅក្នុងប្រទេសកម្ពុជា។

សាខាថ្មីរបស់ធនាគារ វីង ក្នុងខេត្តកំពង់ឆ្នាំង ត្រៀមខ្លួនជាស្រេចដើម្បីដើរតួជាផ្នែកមួយដ៏សំខាន់ក្នុងការជំរុញភាពរីកចម្រើននៅក្នុងសហគមន៍ ក៏ដូចជាពង្រីកសេវាកម្មហិរញ្ញវត្ថុប្រកបដោយភាពងាយស្រួលប្រើប្រាស់ ដែលនឹងជួយជំរុញខេត្តនេះឆ្ពោះទៅរកអនាគតដ៏រុងរឿង៕ កាំង ហុងវាស្នា