អំឡុងពេលនិយាយទៅកាន់អ្នកសារព័ត៌មាន កាលពីថ្ងៃសុក្រ (ទី១៤ ខែមិថុនា) នៅខាងក្រៅកិច្ចប្រជុំកំពូលរបស់ក្រុមប្រទេសធំៗទាំង៧ (G7) ប្រធានាធិបតីបារាំងលោក Emmanuel Macron បានប្រាប់ថា ប្រទេសបារាំងកំពុងប្រឈមនឹង «ពេលវេលាធ្ងន់ធ្ងរខ្លាំង» នៅពេលដែលការបោះឆ្នោតសភា កាន់តែជិតកើតឡើង។

ដោយប្លុកនយោបាយរបស់ក្រុមស្តាំជ្រុលនិយម និងឆ្វេងនិយម ដែលកំពុងនាំមុខនៅក្នុងការស្ទង់មតិ លោក Macron បានប្រើប្រាស់ពាក្យពេចន៍របស់លោក ដើម្បីអធិប្បាយពីគោលនយោបាយសេដ្ឋកិច្ចរបស់បណ្ដាគណបក្សប្រឆាំង។

អមដោយការបន្ថែមថា ប្លុកទាំង២ បានបង្កឲ្យមានស្ថានភាពគ្រោះថ្នាក់ធ្ងន់ធ្ងរ ទាំងផ្នែកនយោបាយ ឬសេដ្ឋកិច្ចជាក់ស្តែង លោក Macron បានប្រាប់អ្នកសារព័ត៌មានថា៖ «មានកម្មវិធីដែលបង្កគ្រោះថ្នាក់យ៉ាងខ្លាំង មិនត្រឹមតែចំពោះសេដ្ឋកិច្ចបារាំង និងអត្រាការប្រាក់ប៉ុណ្ណោះទេ ប៉ុន្តែខ្ញុំជឿថា នឹងមានផលប៉ះពាល់ចំពោះជនរួមជាតិរបស់យើង ដែលមានអ្នកបង់ពន្ធ អ្នកសន្សំប្រាក់ និងអ្នកចូលនិវត្តន៍ផងដែរ»។

ជាមួយគ្នានេះ លោក Macron ក៏បាននិយាយផងដែរថា លោកមានក្តីសង្ឃឹមថា ការសម្រេចលើការងារធំៗជាច្រើន សម្រាប់គណៈកម្មការអឺរ៉ុបនាពេលបន្ទាប់ អាចត្រូវបានសម្រេច នៅសប្តាហ៍ក្រោយ។

គួរបញ្ជាក់ថា មេដឹកនាំសហភាពអឺរ៉ុប (EU) ត្រូវជួបប្រជុំគ្នានៅថ្ងៃចន្ទ (ទី១៧ ខែមិថុនា) សម្រាប់កិច្ចប្រជុំកំពូលក្រៅផ្លូវការមួយ ដែលពួកគេនឹងពិភាក្សាការងារ ក្នុងនោះរួមទាំងប្រធានកិច្ចប្រជុំកំពូលរបស់មេដឹកនាំ EU និងអ្នកតំណាងជាន់ខ្ពស់ទទួលបន្ទុកកិច្ចការបរទេស មុនពេលបញ្ជាក់តួនាទីទាំងនោះ នៅក្នុងកិច្ចប្រជុំកំពូល EU នៅពេលក្រោយ នាថ្ងៃទី ២៨-២៩ ខែមិថុនា៕