អាមេរិក៖ លោកប្រធានាធិបតី Joe Biden និងរដ្ឋបាលរបស់លោកកាលពីថ្ងៃអាទិត្យបានព្យាយាមរៀបចំសណ្ដាប់ធ្នាប់ ស្របពេលមានការប្រណាំងប្រជែងពីបុគ្គលិកអាមេរិក និងបរទេសដទៃទៀតដើម្បីជម្លៀសចេញពីអាហ្វហ្គានីស្ថាន ខណៈក្រុមយុទ្ធជនតាលីបង់ចូលកាន់កាប់ទីក្រុងកាប៊ុល។
សារព័ត៌មាន CNN បាននិយាយថា មានប្រទេសជាង ៦០ បានអំពាវនាវឲ្យមនុស្សចាកចេញពីអាហ្វហ្គានីស្ថានដោយសុវត្ថិភាព។ ការដួលរលំយ៉ាងឆាប់រហ័សនៃកងកម្លាំងជាតិ និងរដ្ឋាភិបាលអាហ្វហ្គានីស្ថាន បានធ្វើឱ្យមានការភ្ញាក់ផ្អើលចំពោះលោក Biden និងសមាជិកជាន់ខ្ពស់នៃរដ្ឋបាលរបស់លោក ដែលកាលពីខែមុនជឿជាក់ថាវាអាចចំណាយពេលច្រើនខែ មុនពេលរដ្ឋាភិបាលស៊ីវិលនៅទីក្រុងកាប៊ុលដួលរលំ បន្ទាប់ពីកងទ័ពអាមេរិកចាកចេញ មុនពេលផលវិបាកខ្លាំងកើតមានដោយសារការដកទ័ពនេះ។ ឥឡូវនេះ ប៉ុន្មានខែបន្ទាប់ពីការប្រកាសដំបូងរបស់លោកថា កងទ័ពអាមេរិក ២.៥០០នាក់នឹងត្រូវចាកចេញពីអាហ្វហ្គានីស្ថាននៅចុងរដូវក្តៅនេះ កងទ័ពសរុប ៦.០០០នាក់ត្រូវបានគេរំពឹងថានឹងជួយសម្រួលដល់ការជម្លៀស។
ហើយក្រុមមន្ត្រីបានសារភាពតាមត្រង់ថា ពួកគេប៉ាន់ស្មានស្ថានការណ៍ខុស។ យោងតាមមន្ត្រីរដ្ឋបាលជាន់ខ្ពស់ម្នាក់បានឱ្យដឹងថា លោក Biden ត្រូវបានគេរំពឹងថានឹងថ្លែងទៅកាន់ប្រជាជាតិ នៅក្នុងរយៈពេលប៉ុន្មានថ្ងៃខាងមុខនេះអំពីវិបត្តិនៅអាហ្វហ្គានីស្ថាន ទោះបីជាការសម្រេចចុងក្រោយស្ដីពីសុន្ទរកថាមួយមិនត្រូវបានធ្វើឡើង ហើយប្រធានាធិបតីមិនទាន់លុបចោលដំណើរទស្សនកិច្ច វិស្សមកាលរដូវក្តៅរបស់លោកទៅកាន់ជំរំ Camp David នៅឡើយក៏ដោយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
