កណ្តាល៖ វិទ្យាស្ថានពហុបច្ចេកទេសតេជោសែន ក្រុងតាខ្មៅ ខេត្តកណ្តាល នៅថ្ងៃទី១៥ខែមិថុនានេះ បានសហកាជាមួយអាជ្ញាធរខេត្តកណ្តាល រៀបចំប្រារព្ធទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៧ ឆ្នាំ២០២៤ ក្រោមប្រធានបទស្តីពី «រៀនឱ្យចប់ ឱ្យចេះ ឱ្យមានការងារធ្វើ» ដែលមានការអញ្ជើញចូលរួមជាអធិបតីពីឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាល ព្រមទាំងមានការចូលរួមពីមន្រ្តីមន្ទីរក្រសួងការងារបណ្តុះបណ្តាល និងវិជ្ជាជីវៈខេត្តកណ្តាល អាជ្ញាធរមូលដ្ឋាន លោកគ្រូ អ្នកគ្រូ និងសិស្ស និស្សិតជាច្រើនរយនាក់។

 នៅអង្គពិធីនេះ ឯកឧត្តម គង់ សោភ័ណ្ឌ អភិបាលខេត្តកណ្តាលបានមានប្រសាសន៍ថា ចំពោះប្រធានបទដែលបានកំណត់យកថា «ការអប់រំបណ្តុះបណ្តាលវិជ្ជាជីវៈ(TVET) រៀនឱ្យចប់ ឱ្យចេះ ឱ្យមានការងារធ្វើ» ដែលជាប្រធានបទមួយកាន់តែជំរុញថែមទៀតឱ្យយុវជន សិស្ស និស្សិត បងប្អូនកម្មករនិយោជិតទាំងក្នុងប្រព័ន្ធ និងក្រៅប្រព័ន្ធ និងប្រជាពលរដ្ឋទាំងអស់កាន់តែចាប់អារម្មណ៍ យល់ដឹងនូវសារៈសំខាន់ ស្រឡាញ់នូវចំណេះជំនាញ រៀនចំណេះដឹងទូទៅផង រៀនវគ្គបណ្តុះបណ្តាលវិជ្ជាជីវៈផង ដើម្បីចាប់យកជំនាញយ៉ាងតិចមួយប្រចាំជីវិតរបស់ខ្លួន។ ម្យ៉ាងវិញទៀតប្រធានបទនេះ ក៍បានឆ្លើយតបទៅនឹងគោលបំណងរបស់រាជរដ្ឋាភិបាលអាណត្តិទី៧ ដែលបានដាក់ចេញកម្មវិធីបណ្តុះបណ្តុលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ។ 

 ឯកឧត្តមបានឱ្យដឹងទៀតថា បច្ចុប្បន្នទីផ្សារការងារសម្រាប់ខេត្តកណ្តាល កំពុងមានតម្រូវការ ការងារជំនាញខ្ពស់បំផុត តាមរយៈគម្រោងវិនិយោគធំៗដូចជា៖អាកាសយានដ្ឋានអន្តរជាតិតេជោ ក្រុងតាខ្មៅ, គម្រោងព្រែកជីកហ្វូណន-តេជោ ដែលនឹងផ្តល់អត្ថប្រយោជន៍មហាសាលសម្រាប់សេដ្ឋកិច្ចខេត្ត ក៍ដូចជាប្រទេសកម្ពុជាទាំងមូល។

 យុវជនបានលើកឡើងដែរថា នឹងខិតខំប្រឹងរៀនជំនាញវិជ្ជាជីវៈ និងបច្ចេកទេសឱ្យចេះពិតប្រាកដ ដើម្បីងាយស្រួលរកការងារធ្វើ ឫអាចប្រកបមុខរបរដោយខ្លួនឯងបាន។ លើសពីនេះ យុវជនបានបង្ហាញអារម្មណ៍រីករាយដែលចូលរួមអបអរសាទរក្នុងទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ ឆ្នាំ២០២៤។

គួរបញ្ជាក់ដែរថា រាជរដ្ឋាភិបាល បានកំណត់យកថ្ងៃទី១៥ ខែមិថុនា ជារៀងរាល់ឆ្នាំ ដើម្បីប្រារព្ធទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ ក្នុងគោលបំណងលើកកម្ពស់គុណភាព គុណតម្លៃ និងកិត្តិនាមនៃការអប់រំបណ្តុះបណ្តាលបច្ចេកទេស និងវិជ្ជាជីវៈ តាមរយៈការផ្សព្វផ្សាយ ការជំរុញ និងលើកទឹកចិត្តទៅសិស្សានុសិស្ស និស្សិត យុវជន និងសាធារណៈជនឱ្យយល់ដឹងកាន់តែច្បាស់ និងទូលំទូលាយ អំពីសារៈសំខាន់នៃការអប់រំបណ្តុះបណ្តាលបច្ចេកទេស និងវិជ្ជាជីវៈ ព្រមទាំងចូលរួមយ៉ាងសកម្មក្នុងការអភិវឌ្ឍកម្លាំងពលកម្មជំនាញប្រកបដោយគុណភាព ដើម្បីឆ្លើយតបទៅនឹងតម្រូវការទីផ្សារការងារទាំងក្នុង និងក្រៅប្រទេស។អត្ថបទ៖ទូច សោភ័ណ