ច្បាប់ថ្មីរបស់ឆ្មាំល្បាតសមុទ្រចិន ដែលចូលជាធរមាននៅថ្ងៃសៅរ៍ (ទី១៥ ខែមិថុនា) នេះ នឹងអនុញ្ញាតឲ្យមន្រ្តីឃុំខ្លួនជនបរទេស នៅក្នុងតំបន់ជម្លោះនៃសមុទ្រចិនខាងត្បូង រហូតដល់ ៦០ថ្ងៃ ដោយមិនចាំបាច់កាត់ទោស។

គួរបញ្ជាក់ថា ទីក្រុងប៉េកាំងបានទាមទារស្ទើរតែទាំងស្រុងនៃតំបន់ដែនទឹក ក្នុងសមុទ្រចិនខាងត្បូងនេះ ដោយបានច្រានចោលការប្រជែងទាមទារពីប្រទេសអាស៊ីអាគ្នេយ៍មួយចំនួន ក្នុងនោះរួមទាំងហ្វីលីពីនផងដែរ និងសេចក្តីសម្រេចអន្តរជាតិ ដែលថា ជំហរអះអាងរបស់ខ្លួននេះមិនមានមូលដ្ឋានផ្លូវច្បាប់នោះឡើយ។

នាវាចិន និងហ្វីលីពីន បានប្រឈមមុខដាក់គ្នាជាបន្តបន្ទាប់ នៅជុំវិញតំបន់ថ្មប៉ប្រះទឹក Second Thomas Shoal ដោយទីក្រុងប៉េកាំងបានចោទប្រកាន់ទីក្រុងម៉ានីលថា បានបញ្ឈប់នាវាកងទ័ពជើងទឹកដោយខុសច្បាប់ នៅតំបន់ដែលមានជម្លោះនេះ។

ហើយយោងតាមច្បាប់របស់ទីក្រុងប៉េកាំង ដែលត្រូវបានផ្សព្វផ្សាយតាមប្រព័ន្ធអ៊ីនធឺណិត បានបង្ហាញថា ចាប់ពីថ្ងៃទី១៥ ខែមិថុនានេះតទៅ ឆ្មាំល្បាតសមុទ្ររបស់ប្រទេសចិននឹងអាចឃុំខ្លួនជនបរទេសដែលសង្ស័យថា បានរំលោភលើការគ្រប់គ្រងច្រកចេញ និងចូលព្រំដែន។

ច្បាប់នេះបានចែងថា រយៈពេលនៃការឃុំខ្លួនរហូតដល់ ៦០ថ្ងៃ ត្រូវបានអនុញ្ញាត សម្រាប់ «ករណីស្មុគស្មាញ» ហើយ «ប្រសិនបើសញ្ជាតិ និងអត្តសញ្ញាណ (របស់អ្នកជាប់ឃុំ) មិនច្បាស់លាស់ រយៈពេលនៃការឃុំខ្លួន សម្រាប់ការត្រួតពិនិត្យ នឹងត្រូវបានរាប់ ចាប់ពីថ្ងៃដែលអត្តសញ្ញាណរបស់ពួកគេ ត្រូវបានកំណត់»។

ហើយច្បាប់បន្ថែមថា៖ «នាវាបរទេសដែលបានចូលដោយខុសច្បាប់ក្នុងដែនទឹករបស់ចិន និងដែនទឹកជាប់គ្នា អាចត្រូវបានឃុំខ្លួនតាមច្បាប់ ដោយមានការយល់ព្រមពីប្រធានភ្នាក់ងារឆ្មាំល្បាតសមុទ្រនៅឯ ឬខាងលើភ្នាក់ងារឆ្មាំល្បាតសមុទ្រក្រុង»៕