ប្រធានាធិបតីអ៊ុយក្រែនលោក វ្ល៉ូឌីមី ហ្ស៊េឡិនស្គី ( Volodymyr Zelensky) មានមហិច្ឆតាដ៏អស្ចារ្យ សម្រាប់កិច្ចប្រជុំកំពូល នៅប្រទេសស្វ៊ីស នៅចុងសប្តាហ៍នេះ ប៉ុន្តែនៅលើសមរភូមិមុខ និងនៅក្នុងទីក្រុង   គីវដែលហត់នឿយដោយសង្រ្គាម ក្តីសង្ឃឹមសម្រាប់ការទម្លាយភាពទាល់ច្រកដ៏សំខាន់ណាមួយនោះ គឺស្ទើរតែគ្មានសោះ។

សន្និសីទដែលមានប្រទេសចំនួន ៩០ និងស្ថាប័នសកលលោកចូលរួម នឹងកើតឡើង ក្នុងពេលដ៏គ្រោះថ្នាក់សម្រាប់ប្រជាជនអ៊ុយក្រែនដែលហត់នឿយ និងទាហានដែលកំពុងស្ថិតក្នុងស្ថានភាពទន់ខ្សោយ បន្ទាប់ពីសង្គ្រាមអស់រយៈពេលជាងពីរឆ្នាំហើយនោះ។

លោក Sergiy ដែលជាមេបញ្ជាការរងនៃកងពលតូចរថក្រោះដែលដាក់ពង្រាយ ទៅកាន់តំបន់ដូណិតស្ក៍ Donetsk ភាគខាងកើត ដែលការប្រយុទ្ធគ្នា គឺខ្លាំងក្លាបំផុតនោះ បាននិយាយថា នៅពេលដែលប្រទេសទាំងអស់ជួបប្រជុំគ្នា ដើម្បីបញ្ចប់ការប្រយុទ្ធគ្នានោះ វាប្រហែលជាមិនមែន នៅក្នុងកិច្ចប្រជុំកំពូលនោះទេ។

បុរសវ័យ ៣៦ឆ្នាំរូបនេះ បានប្រាប់សារព័ត៌មាន AFPថា៖«នយោបាយ គឺនយោបាយ» ដោយគ្រាន់តែគិតថា កិច្ចប្រជុំនេះ នឹងធ្វើឲ្យស្ថានភាពនៅទីក្រុងដូណិតស្ក៍ ល្អប្រសើរឡើង។